پی آئی سی پر حملہ کرنے والوں کو قانون کے مطابق سزائیں دی جائیں گی، ترجمان وزیر اعظم ندیم افضل چن

جمعرات 12 دسمبر 2019 00:20

اسلام آباد ۔ (اُردو پوائنٹ اخبارتازہ ترین - اے پی پی۔ 12 دسمبر2019ء) وزیر اعظم کے ترجمان ندیم افضل چن نے کہا ہے کہ وزیر اعظم عمران خان نے پنجاب انسٹی ٹیوٹ آف کارڈیالوجی (پی آئی سی) پر حملے کا سختی سے نوٹس لیا ہے اور ذمہ داران کو قانون کے مطابق سزائیں دی جائیں گی۔ بدھ کو نجی ٹی وی چینل سے بات چیت کرتے ہوئے انہو نے کہا کہ صوبائی وزیر اطلاعات فیاض الحسن چوہان نے پی آئی سی کے باہر وکلاء کی طرف سے تشدد کا نشانہ بننے پر صبر اور حوصلے کا مظاہرہ کیا ہے۔

انہوں نے کہا کہ میں واقعہ کی شدید الفاظ میں مذمت کرتا ہوں اور میری خواہش ہے کہ مجرمانہ ذہنیت کے لوگوں کو قرار واقعی سزائیں دی جائیں تاکہ مستقبل میں اس طرح کے واقعات کی روک تھام یقینی بنائی جا سکے۔ ترجمان وزیر اعظم نے کہا کہ جنوری میں بار کونسل ایسوسی ایشن کے انتخابات ہونے جا رہے ہیں اور وکلاء اس کی آڑ میں مختلف حربے استعمال کر رہے ہیں۔

(جاری ہے)

ندیم افضل چن نے کہا کہ وکلاء میں بھی بہت بڑا مافیا موجود ہے، لاہور کا وکلاء مافیا سرگودھا میں وکلاء کا بنچ نہیں بننے دے رہے۔ انہوں نے کہا کہ پی آئی سی میں علاج کیلئے 6 مہینے باری نہیں آتی، وہاں پر روزانہ سینکڑوں مریضوں کا علاج ہوتا ہے، اب ہسپتال بند ہے تو اس کا ذمہ دار کون ہے۔ انہوں نے کہا کہ وکلاء نے توڑ پھوڑ کر کے ہسپتال کو جو مالی نقصان پہنچایا ہے تو انہیں یہ نقصان بھرنا ہو گا۔