ریاست جموں و کشمیر وحدت، تقسیم کی باتیں کشمیریوں کے زخموں پر نمک پاشی کے مترادف ہیں

پی ٹی آئی کی حکومت مشکل کی گھڑی میں کشمیریوں کے ساتھ چٹان کی طرح کھڑی ہے سیکرٹری اطلاعات پی ٹی آئی آزاد جموں و کشمیر ارشاد محمود

اتوار 15 دسمبر 2019 16:30

اسلام آباد ۔ (اُردو پوائنٹ اخبارتازہ ترین - اے پی پی۔ 15 دسمبر2019ء) پاکستان تحریک انصاف آزادکشمیر کے سیکرٹری اطلاعات ارشاد محمود نے کہا ہے کہ ریاست جموں و کشمیر ایک وحدت ہے، تقسیم کشمیر کی باتیں کشمیریوں کے زخموں پر نمک پاشی کے مترادف ہیں،پی ٹی آئی کی حکومت مشکل گھڑی میں کشمیریوں کے ساتھ چٹان کی طرح کھڑی ہے۔ان خیالات کا اظہار انھوں نے گزشتہ روز جاری بیان میں کیا۔

(جاری ہے)

انہوں نے کہا کہ 80 لاکھ کشمیری 133دنوں سے لاک ڈائون کا شکار ہیں، قیادت جیل میں ہے، روزمرہ زندگی معطل ہے اور پیغام رسانی کے ذرائع پر پابندی نے مقبوضہ کشمیر میں ایک سنگین انسانی المیہ کو جنم دیا ہے، اس صورتحال کے خلاف دنیا بھر میں کشمیریوں کے لیے ہمدردی اور حمایت کی ایک زبردست لہر اٹھی ہے۔انھوں نے کہا کہ عالمی لیڈروں سمیت انسانی حقوق کے ادارے اور ذرائع ابلاغ بھارت کی پالیسیوں کو تنقید کا نشانہ بنا رہے اور کشمیریوں کے حق میں آواز اٹھا رہے ہیں، ان حالات میں ایسے خدشات کا اظہار کہ کشمیر پر سودے بازی یا تقسیم کشمیرکی کوئی سازش ہورہی ہے کشمیریوں کے حوصلے پست کرنے اور انہیں مایوسی کی دلدل میں ڈالنے کے مترادف ہے جس کا نقصان تحریک آزادی کو ہو گا۔