کشمیر جرنلسٹس فورم کے زیراہتمام کشمیریوں کے ساتھ اظہار یکجہتی کیلئے کشمیری مشاعرہ کا انعقاد

اسلام آباد ۔ (اُردو پوائنٹ اخبارتازہ ترین - اے پی پی۔ 15 دسمبر2019ء) کشمیر جرنلسٹس فورم کے زیراہتمام مقبوضہ کشمیر میں انسانی حقوق کی سنگین خلاف ورزیوں، 133روزہ طویل ترین لاک ڈائون پر نیشنل پریس کلب اسلام آباد میں کشمیری مشاعرہ 2019ء کا انعقاد کیا گیا جس میں ریاست کی تینوں اکائیوں سے تعلق رکھنے والے شعراء نے کشمیر کی صورتحال، بھارتی مظالم، کمیونیکیشن کی معطلی اور لائن آ ف کنٹرول پر بھارتی فائرنگ اور گولہ باری سے نظام زندگی تہس نہس ہونے پر اپنے کلام سے سماں باندھ دیا جبکہ غزل اور نظم اور انقلابی طرز سخن نے دسمبر کی یخ بستہ رات میں ماحول کو گرما دیا، حاضرین کا جوش و خروش دیدنی تھا، مشاعرہ کی صدارت مظفر آباد سے تعلق رکھنے والے معروف شاعر واحد اعجاز میر نے کی جبکہ مہمانان اعزاز میں راولا کوٹ سے تعلق رکھنے والے فاروق طاہر، باغ سے مشتاق بخاری شامل تھے۔

(جاری ہے)

اس موقع پر پی ایف یو جے کے سابق صدر افضل بٹ، پریس کلب کے سیکرٹری انور رضا، کشمیر جرنلسٹس فورم کے صدر زاہد عباسی، سیکرٹری عقیل انجم، مشاعرہ کے کوآرڈینیٹر عرفان سدوزئی، پریس کلب کے ممبر گورننگ باڈی راجہ بشیر عثمانی اور اقبال اعوان نے بھی خطاب کیا جبکہ نیلم سے آئے ہوئے نوجوان شاعر اسلم رضا خواجہ، آزاد کشمیر یونیورسٹی کے شعبہ تدریس سے وابستہ شاعر محمد حق نواز مغل، حبیب الرحمن دراوی، مظفر آباد سے رانا اخلاق، محمد اسرار احمد، ظہور منہاس، گلگت بلتستان سے رشید ارشد، عمار اعظم، راولا کوٹ سے آئے ہوئے شاعر لیاقت شولان، باغ سے عاصم سلیم بٹ، سبطین کاظمی، باغ سے سید محمد علی، عاصم سلیم بٹ نے اپنا کلام پیش کیا۔

مقبوضہ کشمیر سے تعلق رکھنے والے اویس الاسلام ، انجینئر مشتاق، مظفر آباد سے احسن علی بخاری، سماہنی سے راشد تاج، کشمیر جرنلسٹس فورم کے سینئر ممبر اللہ داد صدیقی نے اپناکلام پیش کیا اور بھرپور داد پائی۔