شدید سردی سے متاثرہ لوگوں کو بچانا حکومت کی اولین ترجیح ہے، زرتاج گل

اسلام آباد (اُردو پوائنٹ اخبارتازہ ترین - اے پی پی۔ 16 جنوری2020ء) موسمیاتی تبدیلی کی وزیر مملکت زرتاج گل نے کہا ہے کہ برفباری سے ہونے والی تباہی سے نمٹنے کے لئے حکومت ، ڈیزاسٹر مینجمنٹ اتھارٹی کو مستحکم کرنے کے لئے ٹھوس اقدام اٹھا رہی ہے۔ نجی ٹی چینل سے گفتگو کرتے ہوئے انہوں نے کہا کہ ملک میں حالیہ بارشوں اور برفباری سے متاثرہ لوگوں کو پیش آے والی مشکلات کو دور کرنے کے لئے ہر ممکن اقدامات اٹھائے جائیں گے۔

انہوں نے کہا کہ موسمیاتی تبدیلیوں کی وجہ سے آئندہ چیلنجوں کا مقابلہ کرنے کے لئے موثر ڈیزاسٹر مینجمنٹ لازمی ہے۔ زرتاج گل نے کہا کہ حکومت نے متعلقہ محکموں کو ہدایت کی ہے کہ وہ موسم کی شدید صورتحال کے سبب کسی بھی ہنگامی صورتحال کا مقابلہ کرنے کے لئے چوکس رہیں۔

(جاری ہے)

انہوں نے کہا کہ عالمی آب و ہوا میں ڈرامائی طور پر تبدیلی آرہی ہے اور پاکستان ایک انتہائی غیر محفوظ ممالک میں سے ایک ہے۔

انہوں نے افسوس کا اظہار کیا کہ بدقسمتی سے، سابق حکومتوں نے موسمیاتی تبدیلیوں پر توجہ نہیں دی اور آفات سے نمٹنے کے لئے متعلقہ اداروں کو جدید ترین ٹیکنالوجی فراہم نہیں کیں۔ زرتاج گل نے مختلف علاقوں میں موسلادھار بارش اور برفباری کی وجہ سے قیمتی جانوں کے ضیاع پر دکھ اور افسوس کا اظہار کرتے ہوئے کہا کہ شدید سردی اور برفباری میں متاثرہ لوگوں کو بچانا حکومت کی اولین ترجیح ہے۔

انہوں نے کہا کہ وزیر اعظم عمران خان نے پہلے ہی متعلقہ محکموں کو ہنگامی بنیادوں پر متاثرہ خاندانوں کو امداد فراہم کرنے کا حکم جاری کیا ہے۔ انہوں نے کہا کہ پاک فوج کے ڈاکٹر اور پیرا میڈیکل عملہ متاثرہ افراد کے علاج معالجے میں مصروف ہے اور متاثرہ خاندانوں میں گرم کپڑے ، دوائیاں اور راشن بھی تقسیم کر دیا گیا ہے۔