لاہور و ساہیوال چیمبر آف کامرس کا تاجر برادری کو درپیش مسائل کے حل کیلئے مل کر کام کرنے کا فیصلہ

لاہور۔17 فروری(اُردو پوائنٹ اخبارتازہ ترین - اے پی پی۔ 17 فروری2020ء) لاہور چیمبر آف کامرس اینڈ انڈسٹری اور ساہیوال چیمبر آف کامرس اینڈ انڈسٹری ملک کی معاشی ترقی و خوشحالی اور تاجر برادری کو درپیش مسائل کے حل کے لیے مل کر کام کریں گے۔ یہ فیصلہ لاہور چیمبر کے صدر عرفان اقبال شیخ ، نائب صدر میاں زاہد جاوید احمد اور ساہیوال چیمبر کے صدر شیخ فیصل اکرام کے درمیان لاہور چیمبر میں ملاقات کے دوران کیا گیا۔

ساہیوال چیمبر کے سینئر نائب صدر شیخ جاوید رشید ، نائب صدر شہزاد انجم انصاری اور ایگزیکٹو کمیٹی ممبران بھی اس موقع پر موجود تھے۔ دونوں چیمبرز نے یہ فیصلہ بھی کیا کہ وہ تجارت و سرمایہ کاری کے مواقع پر گہری نظر رکھیں گے اور معلومات کے ساتھ ساتھ ریسرچ ورک کا تبادلہ بھی کریں گے۔

(جاری ہے)

لاہور چیمبر کے صدر عرفان اقبال شیخ اور نائب صدر میاں زاہد جاوید نے کہا کہ لاہور چیمبر آف کامرس اینڈ انڈسٹری اور ساہیوال چیمبر آف کامرس اینڈ انڈسٹری اپنی اپنی جگہ بہت اہمیت کے حامل ہیں ، ان کے درمیان اشتراک بہت دور رس نتائج کا حامل ہوگا اور اس سے لاہور و ساہیوال کے تاجروں کے لیے تجارت و سرمایہ کاری کے نئے دروازے کھلیں گے۔

انہوں نے معاشی چیلنجز سے نمٹنے کے لیے مشترکہ کوششوں کی ضرورت پر زور دیا۔انہوں نے کہا کہ جدید کاروباری طریقوں سے آگاہی حاصل کئے بغیر ہم عالمی سطح پر اپنی شناخت نہیں بناسکتے لہذا اس جانب توجہ دینا بہت ضروری ہے۔ انہوں نے کہا کہ لاہور چیمبر آف کامرس اینڈ انڈسٹری نے برآمدات کے فروغ اور کاروباری آسانیوں کے موضوعات پر رپورٹس تیار کی ہیں جبکہ کاروبار سے متعلقہ ڈیٹا اکٹھا کرنے کے لیے ہر ممکن اقدامات اٹھائے جارہے ہیں۔

انہوں نے لاہور اور سیالکوٹ کی تاجر برادری پر زور دیا کہ وہ برانڈنگ اور مارکیٹنگ کی جانب توجہ دے تاکہ پاکستانی مصنوعات عالمی منڈی میں اپنا خاطر خواہ مقام حاصل کرسکیں۔ انہوں نے ساہیوال چیمبر کے صدر کو لاہور چیمبر کی جانب سے سماجی شعبے میں سرانجام دی جانے والی خدمات سے بھی آگاہ کیا۔ ساہیوال چیمبر آف کامرس اینڈ انڈسٹری کے صدر شیخ فیصل اکرام نے کہا کہ دونوں چیمبر زکے درمیان ہم آہنگی سے تاجر برادری کے درمیان روابط مستحکم ہونگے۔