کرونا وائرس ایک عالمی وباء کی شکل اختیار کر گیا ہے ، قابو پانے کیلئے مشترکہ کوششوں کی ضرورت ہے،سلیم مانڈوی والا

وباء سے جہاں انسانی زندگی کو خطرات لاحق ہیں وہاں معیشتوں کو بھی بھاری نقصان اٹھانا پڑ رہا ہے، خواہش ہے جاپان سے دوطرفہ تعلقات کو مختلف شعبوں میں وسعت دی جائے، ڈپٹی چیئرمین سینیٹ کی جاپانی سفیر سے گفتگو

بدھ 11 مارچ 2020 21:06

کرونا وائرس ایک عالمی وباء کی شکل اختیار کر گیا ہے ، قابو پانے کیلئے ..

اسلام آباد (اُردو پوائنٹ اخبارتازہ ترین - این این آئی۔ 11 مارچ2020ء) ڈپٹی چیئرمین سینیٹ سلیم مانڈوی والا نے کہا ہے کہ کرونا وائرس ایک عالمی وباء کی شکل اختیار کر گیا ہے اور اس پر قابو پانے کیلئے مشترکہ کوششوں کی ضرورت ہے ،وباء سے جہاں انسانی زندگی کو خطرات لاحق ہیں وہاں معیشتوں کو بھی بھاری نقصان اٹھانا پڑ رہا ہے۔ ڈپٹی چیئرمین سینیٹ نے یہ بات بدھ کو جاپان کے سفیر کونینوری موتسدا سے پارلیمنٹ ہائوس میں ملاقات کے دوران گفتگو کرتے ہوئے کہی ۔

ڈپٹی چیئرمین سینیٹ نے کہا کہ اس کا مقابلہ کرنے کیلئے مربوط کوششوں اور جامع حکمت عملی کی ضرورت ہے پاکستان اور جاپان تعلقات کا ذکر کرتے ہوئے ڈپٹی چیئرمین سینیٹ نے دونوں ملکوں کے درمیان تعلقات کو انتہائی اہم قرار دیا اور کہا کہ ہماری خواہش ہے کہ دو طرفہ تعاون کو مختلف شعبوں میں مزید وسعت دی جائے ۔

(جاری ہے)

انہوں نے رائے دی کہ اقتصادی روابط کومزید مستحکم کرنے کیلئے تجارتی عدم توازن کو کم کیا جائے اور تجارتی حجم کو مزید بڑھانے کیلئے عملی اقدامات کئے جائیں ۔

ڈپٹی چیئرمین سینیٹ نے پارلیمانی سفارتکاری کو اہم قرار دیا اور پارلیمانی سطح پر وفود کے تبادلوں میں تیزی لانے پر بھی زور دیا۔ دو طرفہ اقتصادی تعاون کو اہم قرار دیتے ہوئے انہوں نے کہا کہ پاکستان قدرتی وسائل سے مالامال ہے اور جاپانی سرمایہ کار کا کنی ، آٹو موبائل اور ماہی گیری کے شعبوں میں سرمایہ کاری کر سکتے ہیں۔ ڈپٹی چیئرمین سینیٹ نے کہا کہ دونوں ملکوں نے مشکل وقت میں ایک دوسرے کا ساتھ دیا ہے اور ضرورت اس بات کی ہے کہ عوامی سطح پر روابط کو مزید استحکام دیا جائے۔

جاپان کے سفیر نے ڈپٹی چیئرمین سینیٹ کو دوطرفہ تعاون کی اہمیت سے آگاہ کیا انہوں نے کہا کہ پاکستان ایک اہم ملک ہے اور مختلف شعبوں میں سرمایہ کاری اور دوطرفہ تعاون کیلئے اقدامات اٹھائے جا رہے ہیں۔