ایران نے 60 سال بعد آئی ایم ایف سے فنڈز فراہمی کی درخواست کر دی

ملک میں کرونا وائرس کے خطرناک حد تک پھیلاو کے بعد ایرانی حکومت نے عالمی مالیاتی فنڈ سے 5 ارب ڈالرز مانگ لیے

محمد علی جمعرات 12 مارچ 2020 21:05

تہران (اردو پوائنٹ تازہ ترین اخبار۔12مارچ2020ء) ایران نے 60 سال بعد آئی ایم ایف سے فنڈز فراہمی کی درخواست کر دی، ملک میں کرونا وائرس کے خطرناک حد تک پھیلاو کے بعد ایرانی حکومت نے عالمی مالیاتی فنڈ سے 5 ارب ڈالرز مانگ لیے۔ تفصیلات کے مطابق کرونا وائرس کے باعث ایران میں ہونے والی تباہ کاریوں کے بعد ایرانی حکومت نے آئی ایم ایف سے باقاعدہ مدد مانگ لی ہے۔

1962 یعنی 60 سال بعد پہلی مرتبہ ایران نے عالمی مالیاتی فنڈ سے مدد مانگی ہے۔ اس حوالے سے ایران کے مرکزی بینک کے سربراہ عبدالنصر حماتی نے تصدیق کی ہے کہ آئی ایم ایف سے فنڈز کی فراہمی کی باقاعدہ درخواست کی گئی ہے۔ ایران نے آئی ایم ایف کے ریپڈ فناسنگ ڈیپارٹمنٹ انسٹرومنٹ سے درخواست کی ہے کہ اسے 5 ارب ڈالرز فراہم کیے جائیں ۔

(جاری ہے)

ایرانی مرکزی بینک کے سربراہ کے مطابق آئی ایم ایف نے اعلان کیا تھا کہ اس کے پاس وبا سے نمٹنے کے لیے ممبرز ممالک کو دینے کیلئے 50 ارب ڈالرز دستیاب ہیں، اسی لیے ایران نے عالمی مالیاتی فنڈ سے مدد مانگنے کا فیصلہ کیا۔

اس حوالے سے ایرانی وزیرخارجہ جواد ظریف کا کہنا ہے کہ امید ہے کہ آئی ایم ایف ذمہ داری کا مظاہرہ کرے گا اور تاریخ کے صحیح رخ پر کھڑے ہوتے ہوئے ہماری درخواست پر جلد عمل کرے گا۔ تاہم ایران کی درخواست کے حوالے سے آئی ایم ایف حکام نے تاحال کوئی ردعمل نہیں دیا۔ یہاں یاد رہے کہ امریکی و عالمی معاشی پابندیوں کے باعث ایران کسی بھی غیر ملکی ملک یا مالیاتی ادارے سے بینکنگ لین دین نہیں کر سکتا۔

ماہرین کے مطابق آئی ایم ایف کو ایران کو فنڈز کی فراہمی کیلئے امریکا کی اجازت درکار ہوگی۔ امریکا کی جانب سے ایران پر عائد پابندیاں نرم کیے جانے کی صورت میں ہی اسے خصوصی فنڈ فراہم کیا جا سکے گا۔ دوسری جانب ایران میں کرونا وائرس کے نتیجے میں ہلاکتوں میں اضافہ دیکھا گیا ہے، گزشتہ 24 گھنٹوں کے دوران بدھ کو مزید 62 افراد ہلاک ہوگئے جب کہ ملک میں اب تک کی ہلاکتوں کی تعداد بڑھ کر 354 ہو گئی ہے۔میڈیارپورٹس کے مطابق ایران کی وزارت صحت نے کہا کہ ملک میں 9000 تصدیق شدہ مریضوں کو لگنے والا یہ وائرس تمام صوبوں میں پھیل چکا ہے۔