بھارتی فوج منہ تکتی رہ گئی، چینی ہیلی کاپٹر 2 مرتبہ بھارت کی حدود میں کئی کلومیٹرز تک گھسنے میں کامیاب

اپریل کے ماہ میں چینی ہیلی کاپٹرز 2 مرتبہ ہماچل پردیش کے علاقے میں 12 سے 15 کلومیٹر اندر تک گھس آئے، بھارتی فضائیہ ردعمل دینے میں ناکام رہی

محمد علی بدھ 20 مئی 2020 00:31

لداخ (اردوپوائنٹ اخبارتازہ ترین۔19 مئی 2020ء) بھارتی فوج منہ تکتی رہ گئی، چینی ہیلی کاپٹر 2 مرتبہ بھارت کی حدود میں کئی کلومیٹرز تک گھسنے میں کامیاب، اپریل کے ماہ میں چینی ہیلی کاپٹرز 2 مرتبہ ہماچل پردیش کے علاقے میں 12 سے 15 کلومیٹر اندر تک گھس آئے، بھارتی فضائیہ ردعمل دینے میں ناکام رہی۔ تفصیلات کے مطابق بھارتی خبر رساں ادارے کی جانب سے شائع کردہ رپورٹ میں بتایا گیا ہے کہ بھارتی فضائیہ نے تصدیق کی ہے کہ گزشتہ ماہ اپریل میں 2 مختلف مواقعوں پر چین کے ہیلی کاپٹر بھارت کی حدود میں داخل ہوئے تھے۔

بتایا گیا ہے کہ یہ واقعات ہماچل پردیش کے صوبے میں پیش آئے۔ بھارتی فضائیہ کے حکام کا بتانا ہے کہ چین کے ہیلی کاپٹر نے 11 اپریل اور پھر 20 اپریل کو دوبارہ بھارت کی فضائی حدود کی خلاف ورزی کی۔

(جاری ہے)

چینی ہیلی کاپٹر 11 اپریل کو بھارت میں 12 سے 15 کلومیٹر اندر تک گھس آئے تھے۔ جبکہ پھر 20 اپریل کو بھی اسی قسم کی فضائی مداخلت کی گئی۔ تاہم پھر چینی ہیلی کاپٹر بنا کوئی کاروائی کیے ہی واپس لوٹ گئے۔

اس دوران بھارتی فضائیہ صرف منہ تکتی رہی اور چینی ہیلی کاپٹرز کیخلاف کوئی بھی کاروائی عمل میں لانے میں ناکام رہی۔ یہاں واضح رہے کہ بھارت اور چین کے درمیان حالیہ کچھ عرصے کے دوران سرحدی تنازعے میں پھر سے شدت آئی ہے۔ کچھ روز قبل ہی بھارتی اور چینی فوجیوں کے درمیان سرحد پر جھڑپ ہوئی تھی، جس کے نتیجے میں دونوں اطراف کے فوجی زخمی ہوئے تھے۔ دونوں ممالک کے کچھ سرحدی علاقوں کو لے کر دونوں کا دعویٰ ہے کہ یہ علاقے ان کی ملکیت ہیں۔ اسی لیے اکثر دونوں ممالک کے فوجی اہلکاروں کے درمیان ان علاقوں میں جھڑپیں ہوتی رہتی ہیں، اور بیشتر مواقعوں پر بھارتی فوجیوں کی چینی فوجیوں کے ہاتھوں ٹھیک ٹھاک پٹائی ہوتی ہے۔