پاکستان میں امیروں اور غریبوں کی دنیا الگ الگ ہے.یواین ڈی پی

ملکی وسائل کے 50 فیصد پر امیر ترین طبقے کا کنٹرول ہے جبکہ غریبوں کے حصے میں ملکی آمدنی کا صرف7فیصد آتا ہے.اقوامِ متحدہ کے پروگرام برائے ترقی کی رپورٹ

Mian Nadeem میاں محمد ندیم جمعرات 8 اپریل 2021 15:14

پاکستان میں امیروں اور غریبوں کی دنیا الگ الگ ہے.یواین ڈی پی
اسلام آباد(اردوپوائنٹ اخبارتازہ ترین-ا نٹرنیشنل پریس ایجنسی۔08 اپریل ۔2021ء) اقوامِ متحدہ کے پروگرام برائے ترقی (یو این ڈی پی) نے کہا ہے کہ پاکستان کا امیر ترین طبقہ ملکی وسائل کے 50 فیصد پر کنٹرول رکھتا ہے جب کہ ملک کے غریب ترین طبقے کے حصے میں ملکی آمدنی کا صرف 7فی صد آتا ہے جبکہ آبادی کے تناسب کے حساب سے غریب طبقہ اکثریت میں ہے.

(جاری ہے)

یواین ڈی پی کی رپورٹ میں کہا گیا ہے کہ کے غریب ترین طبقے میں انسانی ترقی کی شرح بہت کم ہے جب کہ امیر ترین طبقے میں یہ بہت زیادہ ہے جس سے غریب اور امیر کے درمیان طبقاتی فرق بڑھتا جا رہا ہے اقوامِ متحدہ کے ترقیاتی ادارے کی پاکستان میں نمائندہ آلیانا نکولیتا کا کہنا ہے کہ پاکستان میں عدم مساوات صرف آمدنی اور دولت تک ہی محدود نہیں بلکہ اصل حقیقت یہ ہے کہ پاکستان میں امیر کی دنیا الگ اور غریب کی دنیا الگ ہے.

ان کا کہنا ہے کہ خواندگی کی سطح ہو یا صحت کے ثمرات، یا پھر رہن سہن کے معیارات، انتہائی امیر اور انتہائی غریب الگ الگ دنیا کے باسی لگتے ہیں اقوامِ متحدہ کی رپورٹ میں عدم مساوات کو بنانے اور تقویت دینے کے تین اہم محرکات کی بھی نشان دہی کی گئی ہے جن میں طاقت، لوگ اور حکومتی پالیسیاں شامل ہیں. رپورٹ میں کہا گیا ہے کہ پاکستان کے مختلف صوبوں، مختلف علاقوں، دیہی اور شہری علاقوں کے درمیان بے پناہ عدم مساوات پائی جاتی ہے اسی طرح یہ عدم مساوات ملک کی آبادی کے پسماندہ اور غریب طبقات جیسا کہ بچوں، نوجوانوں، مزدوروں اور خواتین میں بھی واضح طور پر نظر آتی ہے پاکستان میں آمدنی اور دولت کی عدم مساوات بے حد زیادہ ہے پاکستان میں صوبوں کی سطح پر آمدنی میں عدم مساوات بڑھتی جا رہی ہے.

رپورٹ میں کہا گیا ہے کہ پاکستان نے بچوں کو محنت و مشقت سے روکنے اور صنفی ترقی میں ب±ری کارکردگی کا مظاہرہ کیا ہے‘طاقت ور طبقات خامیوں اور پالیسیوں کو اپنے فوائد کے لیے استعمال کرتے ہیں‘طاقت کے استعمال سے ملک میں دولت اور مواقع کی غیر منصفانہ تقسیم عمل میں لائی جاتی ہے‘پاکستان میں کارپوریٹ سیکٹر سب سے زیادہ مراعات یافتہ طبقہ ہے‘پاکستان میں جاگیردار طبقے کے پاس دوسرے نمبر پر سب سے زیادہ مراعات ہیں.

رپورٹ میں کہا گیا ہے کہ ٹیکس پر چھوٹ، کم قیمتیں، زمین اور سرمائے تک ترجیحی بنیادوں پر رسائی سے عام طور پر کارپوریٹ سیکٹر، جاگیردار طبقہ، انتہائی زیادہ آمدنی رکھنے والے لوگ، بڑے تاجر، سرکاری ادارے، ملٹری اسٹیبلشمنٹ اور برآمدکنندگان فائدہ اٹھاتے ہیں‘ایسے طبقات کو صرف سال 2017-18 میں حاصل مراعات کی قدر 2 ہزار 660 ارب روپے تھی جو ملک کی مجموعی آمدن کا 7 فی صد بنتی ہے‘پاکستان میں مزدور، مہاجرین، خواجہ سرا اور خصوصی افراد حکومت کی جانب سے فراہم کی گئی سہولیات پر سے سب سے کم مطمئن ہیں‘کورونا وبا کی وجہ سے جون 2020 تک ملک میں 50 لاکھ افراد بے روزگار ہوئے‘وبا کے اثرات کی وجہ سے سال 2021 کے اختتام تک دو کروڑ 80 لاکھ افراد غربت کی لکیر سے نیچے چلے جائیں گے جبکہ بلوچستان انسانی ترقی کی راہ میں سب سے پیچھے رہ گیا ہے.

یو این ڈی پی کی رپورٹ میں بتایا گیا ہے کہ ملک میں عدم مساوات کے خاتمے کے لیے حکومتی نظام کو موثر کرنے، عدالتی نظام کی بہتری کے علاوہ ٹیکس اصلاحات پر کام کرنا ہو گا رپورٹ میں تجویز دی گئی ہے کہ سبسڈیز یعنی مراعات کا خاتمہ، قیمتوں سے متعلق پالیسی میں تبدیلی اور زمین اور سرمائے تک مساوی رسائی کو بھی ممکن بنانا ہو گا. رپورٹ میں کہا گیا ہے کہ مراعات کے خاتمے سے جو فنڈز اکھٹے کیے جائیں گے انہیں ملک کے پسماندہ ترین طبقات کے لیے مواقع پیدا کرنے کے لیے استعمال کیا جائے یہ کام صحت اور تعلیم کے میدانوں میں اخراجات بڑھا کر اور سماجی تحفظ کے ”احساس“جیسے پروگرام کو موثر اور ٹھیک بنا کر استعمال کیا جا سکتا ہے رپورٹ کے مصنف اور سابق وزیر خزانہ ڈاکٹر حفیظ پاشا کا کہنا ہے کہ اس مشکل صورت حال سے نکلنے کے لیے پاکستانی اشرافیہ جو ملک کے بیشتر وسائل پر کنٹرول رکھتی ہے اس کی حوصلہ شکنی ضروری ہے.

ان کا کہنا ہے کہ اس مقصد کے لیے قوانین میں بہت سی ترامیم ناگزیر ہو چکی ہیں جن میں ٹیکس نظام، پرائنسگ پالیسی اور زمینوں کی خرید و فروخت اور ان تک رسائی شامل ہیں انہوں نے کہا کہ ملک کے مزدور طبقے کی حالت بے حد خراب ہے ان کو بہتر بنانے کے لیے کم سے کم تنخواہوں کے قانون کو بدلنا پڑے گا جب کہ ٹریڈ یونینز کی حوصلہ افزائی کرنی چاہیے ان کے خیال میں دنیا بھر میں پاکستان میں خواتین کے حقوق سے متعلق صورت حال بے حد خراب ہے اب انہیں برابر مواقع فراہم کرنا ضروری ہوگیا ہے اگر یہ تین بڑے اقدامات کیے جائیں تو پاکستان انسانی ترقی کی فہرست میں اوپر جا سکتا ہے.

انہوں نے کہا کہ ایک ایک زمیندار کے پاس چار، چار سو ایکڑ انتہائی زرخیز زمینیں ہیں اب وقت آگیا ہے کہ ملک میں لینڈ ریفارمز کی جائیں تاکہ ہمارے چھوٹے کسانوں کو بھی مراعات دی جائیں‘واضح رہے کہ پاکستان اس وقت دنیا بھر انسانی ترقی میں189 ممالک کی فہرست میں 159ویں نمبر پر ہے جنوبی ایشیا میں پاکستان سے پیچھے صرف افغانستان ہے 2020 کے اختتام پر سامنے آنے والی رپورٹ کے مطابق پاکستان اس فہرست میں ایک سال کے دوران مزید دو پوائنٹس نیچے آیا ہے.