کورونا ویکسین کی عدم دستیابی حکومت کی مجرمانہ غفلت اور نااہلی کا ثبوت ہے، شہباز شریف

شہباز شریف کا ملک میں ویکسین کی قلت پر تشویش کا اظہار، حکومت سے ویکسین کی فی الفور فراہمی کا مطالبہ کر دیا

دانش احمد انصاری اتوار 20 جون 2021 20:56

کورونا ویکسین کی عدم دستیابی حکومت کی مجرمانہ غفلت اور نااہلی کا ثبوت ..

اسلام آباد (اُردو پوائنٹ، اخبار تازہ ترین، 20جون 2021) کورونا ویکسین کی عدم دستیابی حکومت کی مجرمانہ غفلت اور نااہلی کا ایک اور ثبوت ہے ، شہباز شریف کا ملک میں ویکسین کی قلت پر تشویش کا اظہار، حکومت سے ویکسین کی فی الفور فراہمی کا مطالبہ کر دیا ۔ تفصیلات کے مطابق مسلم لیگ (ن) کے صدر شہبازشریف نے ملک میں کورونا ویکسین کی عدم دستیابی پر شدید تشویش کا اظہار کرتے ہوئے کہاکہ حکومت عوام کی زندگیوں سے نہ کھیلے کورونا ویکسین کی فی الفور فراہمی کا بندوبست کرے ۔

بائیس کروڑ عوام کی آبادی کو مد نظر رکھتے ہوئے منصوبہ بندی کی جائے۔چند لاکھ ڈوز منگوانے اور خیراتی ویکسین سے کام چلانے کی چھوٹی سوچ تبدیل کی جائے ۔انہوںنے کہاکہ کورونا ویکسین کی عدم دستیابی حکومت کی مجرمانہ غفلت اور نااہلی کا ایک اور ثبوت ہے ۔

(جاری ہے)

اپوزیشن نے بار بارخبردار کیا کہ عوام کی زندگیاں موذی وائر سے محفوظ بنانے کے لئے بروقت ویکسین کی بکنگ کرائی جائے۔

ویکسین کے فراہمی کے معاملے میں وہی کچھ ہورہا ہے جو ایل این جی کی فراہمی کے معاملے میں ہوا تھا ۔آٹا چینی دوائی کے معاملے میں جس طرح مفادپرستوں نے جیبیں بھریں، کورونا ویکسین میں وہی کچھ دوہرایا جارہا ہے ۔انہوںنے کہاکہ افسوس ہے کہ عوام کی زندگی کے معاملے میں حکومت مجرمانہ غفلت کا سنگین ترین مظاہرہ کررہی ہے ۔1200 ارب روپے کے کورونا ریلیف پیکج پر کرپشن کے سنگین سوالات نے صورتحال پہلے ہی گھمبیر بنارکھی ہے ۔

عوامی سرمائے کی چوری انتہاپر ہے اور عوام کو خدمات کی فراہمی صفر ہے۔حکومت کی چوری، نااہلی اور بدانتظامی کی سزا عوام کو مل رہی ہے جو افسوسناک اور قابل مذمت ہے۔دوسری جانب آج ہی کے روز چین سے کورونا ویکسین کی 15لاکھ خوراکیں پاکستان پہنچا دی گئیں۔ نیشنل کمانڈ اینڈ آپریشن سینٹر کے مطابق کورونا ویکسین کی 15لاکھ خوراکیں چین سےخصوصی پروازکے ذریعے پاکستان پہنچائی گئی ہیں ، وفاقی دارالحکومت اسلام آباد پہنچے والی ویکسین سائیو ویک ہیں۔

بتایا گیا ہے کہ چین سے رواں ماہ کورونا ویکیسن کی 80 لاکھ خوراکیں پاکستان پہنچ جائیں گی، چین سے رواں ماہ تیار ویکسین کی50 لاکھ اور کین سائنو ویکسین کی 30 لاکھ خوراکیں خام مال کی صورت ملیں گی ، ذرائع وزارت صحت کے مطابق چین سے رواں ماہ پاکستان کیلئے مجموعی طور پر کورونا ویکیسن کی 80 لاکھ خوراکیں آئیں گی ، رواں ماہ 50 لاکھ تیار ویکسین پاکستان پہنچے گی جب کہ 20 سے 22 جون کے درمیان کین سائنو ویکسین کی 30 لاکھ خوراکوں کا خام مال بھی پاکستان پہنچےگا۔