نیوزی لینڈ نے یکطرفہ فیصلہ کیا، معاملہ آئی سی سی میں اٹھائیں گے: رمیز راجہ

دورے کی منسوخی کا فیصلہ پاکستانی فینز کے لیے افسوس ناک ہے: چیئرمین پی سی بی

Zeeshan Mehtab ذیشان مہتاب جمعہ 17 ستمبر 2021 16:47

نیوزی لینڈ نے یکطرفہ فیصلہ کیا، معاملہ آئی سی سی میں اٹھائیں گے: رمیز ..
راولپنڈی (اردو پوائنٹ تازہ ترین اخبار ۔ 17 ستمبر 2021ء ) پاکستان کے دورے پر آئی نیوزی لینڈ کرکٹ ٹیم کے بورڈ کی جانب سے دورے کی منسوخی کے خلاف پاکستان کرکٹ بورڈ کے چیئرمین رمیز راجہ نے آئی سی سی جانے کا اعلان کردیا ہے ۔ اپنے ٹویٹ میں رمیز راجہ نے لکھا کہ ’’ آج کا دن ہیجان انگیز رہا! شائقین اور ہمارے کھلاڑیوں کے لیے بہت افسوس ناک دن ہے، سکیورٹی کے خطرے پر یکطرفہ انداز اپناتے ہوئے دورے کو منسوخ کرنا بہت مایوس کن ہے بالخصوص تب جب معلومات کا تبادلہ بھی نہ کیا گیا ہو، نیوزی لینڈ کس دنیا میں رہ رہا ہے؟ اب وہ ہمیں آئی سی سی میں سنے گا‘‘۔

پاکستان اور نیوزی لینڈ کے درمیان 3 ایک روزہ میچوں کی سیریز کا پہلا میچ آج راولپنڈی سٹیڈیم میں دوپہر ڈھائی بجے شروع ہونا تھا اور پاکستان 18 سال بعد اپنی سرزمین پر نیوزی لینڈ ٹیم کی میزبانی کے لیے تیار تھا تاہم اچانک مہمان ٹیم کی کرکٹ بورڈ نے دورہ ختم کرکے ٹیم کو واپس بلانے کا اعلان کردیا۔

(جاری ہے)

اس حوالے سے پاکستان کرکٹ بورڈ نے بتایا کہ نیوزی لینڈ کی ٹیم اور آفیشلز کو فول پروف سکیورٹی فراہم کی گئی تھی جس پر انھوں نے اطمینان کا اظہار بھی کیا تھا تاہم اچانک نیوزی لینڈ کرکٹ بورڈ نے دورہ منسوخ کردیا۔

پی سی بی کے مطابق نیوزی لینڈ کرکٹ بورڈ نے صبح بتایا کہ انھیں سیکیورٹی خدشات کے حوالے سے الرٹ موصول ہوئے ہیں جس کے باعث دورہ پاکستان منسوخ کرنا ہوگا اور ٹیم کو واپس وطن بھیج دیا جائے۔ پاکستان کرکٹ بورڈ کی جانب سے جاری بیان میں کہا گیا ہے کہ ہم دورے کو شیڈول کے مطابق جاری رکھنا چاہتے ہیں اور تمام انتظامات بھی مکمل ہیں لیکن آخری لمحے میں نیوزی لینڈ کے فیصلے سے کرکٹ کے شائقین کو مایوسی ہوئی ہے۔