سرگودھا ‘ جاری پولیو مہم میں نوجوان نے پولیو ٹیم پر حملہ کر کے ورکرز خواتین کو تشدد کا نشانہ بناڈالا

جمعرات 23 ستمبر 2021 14:12

سرگودھا(اُردو پوائنٹ اخبارتازہ ترین - این این آئی۔ 23 ستمبر2021ء) سرگودھا میں جاری پولیو مہم میں نوجوان نے پولیو ٹیم پر حملہ کر کے ورکرز خواتین کو تشدد کا نشانہ بنایا اور فرار ہو گیا۔ضلعی حکام نے واقعہ کا نوٹس لیتے ہوئے رپورٹ طلب کر لی پولیس نے مقدمہ درج کر کے ملزم کو گرفتار کر لیا۔زرائع کے مطابق سرگودھا ریجن میں پانچ روزہ انسداد پولیو مہم جاری ہے کہ اس دوران ریجن کے علاقہ خوشاب میں بغیر پولیس تحفظ کے پولیو مہم کام میں مصروف تھی کہ محلہ عمران آباد میں نوجوان نے پولیو ٹیم پر حملہ کر کے ورکرز خواتین کو تشدد کا نشانہ بنایا اور فرار ہو گیا۔

ڈپٹی کمشنر محمد حمزہ سالک اور ڈی پی او محمد نوید نے واقعہ کا نوٹس لیتے ہوئے رپورٹ طلب کر لی جس پر تھانہ خوشاب پولیس نے پولیو ٹیم پر حملہ میں ملوث عمران آباد کے نوجوان نذر عباس کے خلاف کار سرکار میں مداخلت کرنے پر دفعہ ،354،186 ،341 اور 506 کے تحت مقدمہ درج کر کے ملزم کو گرفتار کر لیا۔

(جاری ہے)

ڈپٹی کمشنر خوشاب محمد حمزہ سالک نے کہا ہے کہ پولیو ٹیموں کی سکیورٹی پر کوئی سمجھوتہ نہیں کیا جاے گا۔ کسی کو بھی سرکار کے کام میں رکاوٹ ڈالنے اور قانون کو ہاتھ میں لینے کی اجازت ہر گز نہ دی جاے گی اور ایسے شرپسند عناصر سے سختی سے نمٹا جائے گا ڈی پی او خوشاب محمد نوید نے کہا کہ ملزم کے خلاف سخت قانونی کاروئی عمل میں لائی جائے گی۔