محمد ادریس کراچی چیمبر کے صدر، عبدالرحمان نقی سینئر نائب صدر، قاضی زاہد نائب صدر منتخب

کراچی (اُردو پوائنٹ اخبارتازہ ترین - این این آئی۔ 23 ستمبر2021ء) کراچی چیمبر آف کامرس اینڈ انڈسٹری (کے سی سی آئی) کی منیجنگ کمیٹی نے متفقہ طور پر محمد ادریس کو 2021-22 کے لیے کے سی سی آئی کا صدر منتخب کیا ہے۔ جمعرات کو ہونے والے اجلاس میں عبدالرحمان نقی سینئر نائب صدر اور قاضی زاہد حسین نائب صدر منتخب ہوگئے۔محمد ادریس جو دو دہائیوں سے زیادہ عرصے سے بی ایم جی سے وابستہ ہیں انہوں نی2013-14 میں کے سی سی آئی کے نائب صدر اور 2009 سے 2015 تک کراچی الیکٹرانکس ڈیلرز ایسوسی ایشن (کیڈا) کے صدر کی حیثیت سے بھی خدمات انجام دیںاوروہ وزارت میری ٹائم افیئرز اور سندھ آئی ٹی بورڈ کی کمیٹی کے رکن کے طور پر بھی خدمات انجام دے چکے ہیں۔

چیئرمین بی ایم جی و سابق صدر کے سی سی آئی زبیر موتی والا، وائس چیئر مین بی ایم جی و سابق صدور کے سی سی آئی طاہر خالق، ہارون فاروقی، انجم نثار، جاوید بلوانی اور جنرل سیکرٹری اے کیو خلیل نے نو منتخب عہدیداروں کو مبارکباد دیتے ہوئے امید ظاہر کی کہ نومنتخب عہدیداران کے سی سی آئی کے امور کو مزید بہتر بنانے کے لیے بھرپور کوشش کریں گے اور تاجروصنعتکار برادری کو درپیش مسائل کو حل کرنے کے لیے تندہی سے کام کریں گے۔

(جاری ہے)

یہ بات قابل ذکر ہے کہ بزنس مین گروپ (بی ایم جی) گزشتہ 24 سالوں سے مسلسل کے سی سی آئی کے انتخابات جیت رہا ہے جو کراچی کی پوری تاجروصنعتکار برادری کی زبردست حمایت کو واضح کرتا ہے۔ بی ایم جی بلاشبہ ’’عوامی خدمت‘‘ کی شفاف پالیسی کی وجہ سے پوری تاجروصنعتکار برادری کا اعتماد بحال کرنے میں کامیاب ہوئی ہے۔ تمام عہدیداروں نے اپنے دور میں چیئرمین بی ایم جی کی ہدایات پر سختی سے پیروی کی۔

چیئرمین بی ایم جی و سابق صدر کے سی سی آئی زبیر موتی والا نے مرحوم سراج قاسم تیلی کی پالیسیوں پر من وعن عمل کرنے اور مشن کو جاری رکھنے کا عزم دہراتے ہوئے کہا کہ وہ یقین رکھتے ہیں اور وقتاً فوقتاً عہدیداروں کو یہی مشورہ دیتے رہے ہیں کہ جو بھی اپنے مسائل کے حل کے لیے کراچی چیمبر سے مدد طلب کرنے کے لیے کے سی سی آئی کی سیڑھیاں چڑھ کر آئے اس کے حقیقی مسائل کو حل کرنے کی ہر ممکن کوشش کی جائے چاہے رابطہ کرنے والا شخص کے سی سی آئی کاممبر ہو یا نہیں۔

بی ایم جی کی پوری تاجروصنعتکار برادری کی مخلصانہ خدمت کرنے کی واضح اور شفاف پالیسی کی وجہ سے کے سی سی آئی کو کراچی کی تاجروصنعتکار برادری کا حقیقی نمائندہ ہونے اور ملک کے سب سے بڑے چیمبر کی نمایاں آواز ہونے کا اعزاز حاصل ہے۔کے سی سی آئی کے نو منتخب عہدیداروں نے کے سی سی آئی کے ممبران اور پوری تاجروصنعتکار برادری کی توقعات کے مطابق اپنی خدمات سرانجام دینے کے عزم کا اظہار کیا۔ انہوں نے یقین دلایا کہ ملک کے پریمیئر چیمبر کے مختلف مقاصد کے حصول کے لیے کوئی کسر نہیں چھوڑی جائے گی۔