وزیراعظم نے جنگلات پر قبضے کرنے والوں‌ کو آخری وارننگ جاری کر دی

سیاسی اشرافیہ لینڈ مافیا کےساتھ جنگلات سمیت بڑے سرکاری رقبے پر قابض ہے، وزیراعظم کا ٹویٹ

دانش احمد انصاری اتوار 21 نومبر 2021 19:22

وزیراعظم نے جنگلات پر قبضے کرنے والوں‌ کو آخری وارننگ جاری کر دی

اسلام آباد (اُردو پوائنٹ، اخبار تازہ ترین، 21 نومبر 2021) سیاسی اشرافیہ لینڈ مافیا کےساتھ جنگلات سمیت بڑے سرکاری رقبے پر قابض ہے، وزیراعظم عمران خان نے جنگلات پر قبضے کرنے والوں‌ کو آخری وارننگ جاری کر دی۔ تفصیلات کے مطابق وزیراعظم عمران خان نے ملک بھر کے جنگلات کی اراضی پر ہونے والے قبضوں پر تشویش کا اظہار کیا ہے۔نجی ٹی وی کے مطابق وزیراعظم عمران خان نے جنگلات پر ہونے والے قبضوں سے متعلق ایک بیان جاری کیا، جس میں حقائق پیش کیے ہیں۔

وزیراعظم نے بتایا کہ ’پاکستان میں جنگلات کی زمینوں پر لینڈ مافیا قابض ہے، جس کی وجہ سے ملک میں جنگلات کے رقبے میں مسلسل کمی ہورہی ہے‘۔

مزید جو ہوشربا حقائق ہمارےعلم میں آئےانکے مطابق:

1- تین بڑے شہروں کی زمینوں سمیت لینڈ مافیا کے زیر قبضہ سرکاری اراضی کی مجموعی مالیت تقریباً 5595 ارب روپے ہے۔

2- جنگلات کے زیرِ قبضہ رقبے کی قیمت تقریباً 1869 ارب روپے ہے۔
— Imran Khan (@ImranKhanPTI) November 21, 2021

انہوں نے اس حوالے سے حکومت کے علم میں آنے والے ہوشربا حقائق قوم کے سامنے رکھتے ہوئے بتایا کہ لینڈ مافیا کے قبضے میں ملک کے تین بڑے شہروں کی تقریباً 5595 ارب روپے مالیت کی سرکاری اراضی ہے، جنگلات کے زیر قبضہ رقبےکی قیمت تقریباً 1869 ارب روپے ہے۔

(جاری ہے)

وزیراعظم نے بتایا کہ ’زمینوں کا ڈیجیٹل ریکارڈ جمع کرنے کی کوشش کی تو حکومت کو شدید مزاحمت کا سامنا کرنا پڑا، ای وی ایم پر احتجاج کی طرح کیڈیسٹرل میپنگ میں بھی مزاحمت کی گئی‘۔

جنگلات کی زمینوں پر لینڈ مافیا کے اس قبضے سے پاکستان کو جنگلات کے مناسب حجم کے حوالے سے درپیش موجودہ کمی میں مزید شدت پیدا ہوئی۔

اس مصدقہ ڈیجیٹل ریکارڈ کی مدد سے اب ہم ان لینڈ مافیاز اور انکے سہولت کاروں کیخلاف کارروائی کریں گے۔
— Imran Khan (@ImranKhanPTI) November 21, 2021

انہوں نے مزید بتایا کہ سرکاری اراضی کےابتدائی سروے میں ہی مزاحمت کی وجوہات سامنےآگئیں، سیاسی اشرافیہ لینڈ مافیا کےساتھ جنگلات سمیت بڑے سرکاری رقبے پر قابض تھی۔

واضح رہے کہ جنگلات دنیا کے تین چوتھائی حیوانات اور نباتات کو محفوظ بناتے ہیں اور فضا سے کاربن ڈائی آکسائڈ جذب کرتے ہیں اور خوراک، ایندھن اور ادویات بھی فراہم کرتے ہیں۔لیکن وہ تیزی سے صاف ہو رہے ہیں، ڈنمارک کا جتنا رقبہ ہے اتنے رقبے پر ہر سال لگے پرانے جنگلات صاف ہو جاتے ہیں۔کیو بُوٹینک گارڈن سے وابستہ محقق کا کہنا ہے کہ درست اقسام کے درخت درست جگہوں پر لگانا تمام ملکوں کے لیے ترجیح ہونی چاہیے کیونکہ دنیا کو ایک ایسی دہائی کا سامنا ہے جو کرۂ ارض کو بچانے کے لیے انتہائی اہم ہو گی۔دنیا کے کئی حصوں میں بڑے پیمانے پر درخت لگانے کے منصوبے جاری ہیں تاکہ جو درخت اور جنگلات صاف ہو گئے ہیں ان کا ازالہ کیا جا سکے۔