سندھ ہاؤس حملہ کیس،پی ٹی آئی ایم این ایز فہیم خان اور عطااللہ کی ضمانت پر رہائی کا حکم

جمعرات 28 اپریل 2022 21:45

اسلام آباد (اُردو پوائنٹ اخبارتازہ ترین - این این آئی۔ 28 اپریل2022ء) عدالت نے سندھ ہاؤس حملہ کیس میں گرفتار پی ٹی آئی کے دو ارکان قومی اسمبلی کو ضمانت پر رہا کرنے کا حکم دیا ۔جوڈیشل مجسٹریٹ انعام اللہ نے پی ٹی آئی کے رکن قومی اسمبلی فہیم خان اور عطا اللہ کو ضمانت پر رہا کرنے کا حکم دیا۔

(جاری ہے)

عدالت نے ملزمان کی درخواست ضمانت بعد ازگرفتاری منظور کرلی اور ملزمان کو 50،50 ہزار روپے کے مچلکے جمع کرانے کی ہدایت کی گئی ہے اس کے علاوہ عدالت نے پی ٹی آئی کے رہنما رائے تنویر کی درخواست ضمانت بعد ازگرفتاری بھی منظور کرلی۔

واضح رہے کہ اسلام آباد ہائیکورٹ سے ضمانت خارج ہونے پر تینوں ملزمان کو احاطہ عدالت سے گرفتار کیا گیا تھا اور مقامی عدالت نے تینوں ملزمان کو جوڈیشل ریمانڈ پر جیل بھیج دیا تھا۔پی ٹی آئی کے رکن قومی اسمبلی فہیم خان عام انتخابات 2018 میں این اے 241 کراچی کورنگی سے منتخب ہوئے تھے جب کہ عطا اللہ بھی عام انتخابات 2018 میں این اے 250 کورنگی ویسٹ تھری سے رکن منتخب ہوئے تھے۔