نسیم شاہ نے رضوان کو لاکھوں میں ایک قرار دیدیا

قومی ٹیم کی جوڑی نے کئی ریکارڈز اپنے نام کیے ،آہستہ بیٹنگ کرنے پر تنقید کرنے والوں کو اپنی بیٹنگ سے بھرپور جواب دیا

جمعہ 23 ستمبر 2022 16:57

نسیم شاہ نے رضوان کو لاکھوں میں ایک قرار دیدیا

کراچی (اُردو پوائنٹ اخبارتازہ ترین - این این آئی۔ 23 ستمبر2022ء) قومی ٹیم کے نوجوان فاسٹ بولر نسیم شاہ نے وکٹ کیپر بیٹر محمد رضوان کو لاکھوں میں ایک قرار دیدیا۔گزشتہ روز کھیلے گئے میچ میں پاکستانی بیٹرز نے شاندار بلے بازی کا مظاہرہ کرتے ہوئے انگلینڈ کی جانب سے دیا گیا 200 رنز کا بڑا ہدف بغیر کسی وکٹ کے نقصان کے پورا کر لیا۔بابر اعظم نے شاندار سنچری اسکور کی تو محمد رضوان نے بھی 88 رنز کی برق رفتار اننگز کھیلی اور اپنی ٹیم کی جیت میں اہم کردار ادا کیا۔

قومی ٹیم کی جوڑی نے کئی ریکارڈز اپنے نام کیے ،آہستہ بیٹنگ کرنے پر تنقید کرنے والوں کو بھی اپنی بیٹنگ سے بھرپور جواب دیا۔اس معاملے پر قومی ٹیم کے نوجوان فاسٹ بولر نسیم شاہ نے بھی سوشل میڈیا پر ایک ٹوئٹ کر کے بابر اعظم اور محمد رضوان سمیت پوری ٹیم کو مبارکباد دی۔

(جاری ہے)

نسیم شاہ نے اپنی ٹوئٹ میں لکھا شاندار سنچری کرنے پر بابر اعظم کو مبارکباد پیش کی اور لکھا کہ محمد رضوان آپ لاکھوں میں ایک ہیں۔

قومی ٹیم کے کپتان بابر اعظم انگلینڈ کے خلاف شاندار سنچری سے ٹی ٹوئنٹی کرکٹ میں دو سنچریاں بنانے والے پہلے پاکستانی بیٹر بن گئے ،اس شاندار فتح سے اپنے اسٹرائیک ریٹ پر تنقید کرنے والوں کے منہ بھی بند کروا دئیے۔اس فتح پر مارے جذبات میں بابر سلیبریشن کرتے اچھل پڑے جبکہ محمد رضوان کی بھی خوشی بھی دیدنی تھی اور وکٹ کیپر بیٹر کی سلیبریشن کی ویڈیو سوشل میڈیا پر وائرل ہو گئی ویڈیو میں رضوان کو بابر کی سنچری پر خوشی سے بلا اٹھاتے اور جشن مناتے دیکھا گیا۔

بعد ازاں بابر اور رضوان جہاں گلے ملے پاکستانی بولر حارث رف اور نسیم شاہ سمیت دیگر کھلاڑیوں نے بھی خوشی سے تالیاں بجاکر جشن منایا اور کپتان کو مبارکباد پیش کی۔قومی ٹیم کے مڈل آرڈر بیٹر خوشدل شاہ نے بھی سوشل میڈیا پر بابر اعظم پر تنقید کرنے والوں کو جواب دیا۔