سابق بھارتی کرکٹر وریندر سہواگ کا امپائرز کو رشوت دیکر فیصلے تبدیل کروانے کا انکشاف

سہواگ نے جن امپائرز کو رشوت دینے کا اعتراف کیا وہ دونوں اس دنیا سے رخصت ہوچکے ہیں

ذیشان مہتاب اتوار 29 جون 2025 20:34

سابق بھارتی کرکٹر وریندر سہواگ کا امپائرز کو رشوت دیکر فیصلے تبدیل ..

نئی دہلی (اردو پوائنٹ تازہ ترین اخبار ۔ 29 جون 2025ء ) سابق بھارتی اوپننگ بلے باز وریندر سہواگ نے امپائرز کو رشوت دینے کا انکشاف کر کے کرکٹ حلقوں میں نیا پنڈورا باکس کھول دیا۔

سوشل میڈیا پر وائرل ویڈیو کلپ میں جارحانہ بلے بازی کرنے والے بیٹر وریندر سہواگ نے نہ صرف امپائرز کو دوران میچ رشوت دینے کا اعتراف کیا بلکہ ویڈیو میں اپنے قصے سناتے دکھائی دئیے۔

وریندر سہواگ کہتے ہیں سابق بھارتی کپتان سچن ٹنڈولکر اور میں ایک ہی کمپنی کے پیڈز پہنتے تھے، جنوبی افریقی امپائر روڈی کرٹزن کو ویسے ہی پیڈز اپنے بیٹے کے لیے بھی چاہیے تھے، امپائر نے مجھ سے پوچھا کہ میں یہ پیڈز کہاں سے خرید سکتا ہوں جس پر میں نے کہا کہ آپ کو کس لیے چاہیے روڈی کرٹزن نے بتایا کہ انھیں یہ پیڈز اپنے بیٹے کے لیے چاہیے‘۔

(جاری ہے)

انہوں نے بتایا کہ میچ ختم ہوتے ہی میں نے وہ پیڈز اتار کر امپائر روڈی کرٹزن کو گفٹ کر دیئے جس پر انہوں نے کہا کہ آپ کے پیڈز نہیں چاہیے تو میں نے جواب دیتے ہوئے کہا کہ کوئی بات نہیں یہ میری طرف سے اپ کے بیٹے کے لیے گفٹ ہیں۔

انہوں نے مزید کہا کہ امپائر نے میرا شکریہ ادا کیا، میں نے امپائر روڈی کرٹزن سے کہا بس مجھے ایک میچ میں آؤٹ نہ دینا، انہوں نے پھر ایک نہیں بلکہ 2 سے 3 میچز میں مجھے آؤٹ نہیں دیا۔

وریندر سہواگ نے امپائر کو اپنے حق میں فیصلے دینے سے متعلق ایک اور واقعہ سناتے ہوئے کہا کہ امپائر ڈیوڈ شیفرڈ زیادہ تر بھارت اور انگلینڈ کے درمیان میچز میں امپائرنگ کرتے تھے، ڈیوڈ شیفرڈ امپائرنگ کرنے کے لیے بھارت میں موجود تھے، ایک میچ میں وہ لیگ امپائر کی ذمہ داری نبھا رہے تھے تو میں اسکوائر لیگ پر کھڑا تھا، میں نے ڈیوڈ سے اٴْن کی طبیعت سے متعلق پوچھا، جس پر انہوں نے کہا کہ وہ ٹھیک ہیں، جب میں ڈیوڈ سے بھارت کی میزبانی سے متعلق سوال کیا تو اس نے کہا مجھے آئس کریم کھانے کے لیے نہیں مل رہی۔

وریندر سہواگ نے بتایا کہ میں نے امپائر ڈیوڈ شیفرڈ سے پوچھا کہ ایسا کیوں ہی تو اس نے جواب دیا کہ کیٹرز مجھے آئس کریم نہیں دے رہے، تو پھر میں بریک کے بہانے اندر گیا اور کیٹر ز کے ہیڈ کو بلا کر اٴْسے کہا کہ امپائر روم میں اگر ونیلا، چاکلیٹ اور اسٹابیری آئسکریم چائے کے وقفے میں نہ ملی تو تمھاری نوکری گئی۔

بھارتی بلے باز نے بتایا کہ جب میں چائے کے وقفے کے بعد ڈیوڈ شیفرڈ واپس آیا تو میں نے اٴْس سے پوچھا کہ آئس کریم کیسی تھی تو اس نے کہا کہ آئس کریم کے بارے میں تمھیں کیسے پتا چلا سہواگ کے بقول میں نے جواب دیا کہ آئس کریم کا انتظام میں نے ہی کروایا تھا۔

جس پر اس نے شکریہ ادا کرتے ہوئے پوچھا کہ اس کے بدلے میں کیا چاہتے ہو تو میں نے اس سے کہا کہ بس ایک بار مجھے آؤٹ مت دینا۔

خیال رہے کہ وریندر سہواگ نے وائرل ویڈیو میں جن 2 امپائرز پر رشوت کے الزامات عائد کیے ہیں وہ دونوں امپائرز انتقال کر چکے ہیں، امپائر ڈیوڈ شیفرڈ 2009ء میں جب کہ روڈی کرٹزن 2022ء میں ٹریفک حادثے میں چل بسے تھے۔

یاد رہے کہ ماضی میں بھی وریندر سہواگ امپائرز کو رشوت دینے کے الزامات عائد کرتے رہے ہیں جس میں وہ بھارت کا دورہ کرنے والے امپائرز کو مفت میں کھانا کھلانے یا پھر انھیں دیگر سہولیات فراہم کرنے کے عوض آؤٹ نہ دینے کا کہتے رہے ہیں۔