آزادکشمیر بلدیاتی انتخابات کے تیسرے مرحلے میں بھی پی ٹی آئی کی برتری

میرپور ڈویژن کی 1083 نشستوں میں سے اب تک 131 کے غیرحتمی ںتائج موصول ہوگئے، تحریک انصاف 54 نشستوں کے ساتھ پہلے نمبر پر

دانش احمد انصاری جمعرات 8 دسمبر 2022 23:38

آزادکشمیر بلدیاتی انتخابات کے تیسرے مرحلے میں بھی پی ٹی آئی کی برتری

مظفر آباد(اُردو پوائنٹ، اخبار تازہ ترین، 8دسمبر 2022) آزادکشمیر بلدیاتی کے تیسرے مرحلے میں بھی پی ٹی آئی نے برتری حاصل کر لی۔میرپور ڈویژن کی 1083 نشستوں میں سے اب تک 131 کے غیرحتمی ںتائج موصول ہوگئے،تحریک انصاف 54 نشستوں کے ساتھ پہلے نمبر پرہے۔ جبکہ 33 نشستوں کے ساتھ دوسرے نمبر پر آزاد امیدواروں نے کامیابی حاصل کی۔ ن لیگ کے 31 اور پیپلزپارٹی کے 13 امیدوار بھی کامیاب ہوگئے۔

تفصیلات کے مطابق آزاد کشمیر بلدیاتی انتخابات کے تیسرے اور آخری مرحلے کے سلسلے میں میرپور ڈویژن میں پولنگ کے بعد ووٹوں کی گنتی جاری ہے۔ بلدیاتی الیکشن کے تیسرے مرحلے میں میرپور،کوٹلی اوربھمبر میں انتخابات ہوئے، پولنگ کےد وران کہیں ہاتھا پائی ،کہیں تلخ کلامی اور کہیں دھکم پیل ہوئی۔

(جاری ہے)

میرپور میں پی ٹی آئی اور ن لیگ کے کارکن لڑپڑے، بھمبرمیں بلدیاتی امیدوار کے حامیوں اور پریزائیڈنگ افسر میں تلخ کلامی کے بعد کشیدگی ہوگئی جس کے بعد تین افراد کو گرفتار کرلیا گیا،کوٹلی میں بھی سیاسی جماعتوں کےکارکن آمنے سامنے آگئے۔

میر پور ڈویژن کے تینوں اضلاع میں 31 سال بعد ہونے والے بلدیاتی الیکشن میں شہری پرجوش نظر آئے، بزرگ شہری بھی ووٹ ڈالنے آئے۔ واضح رہے کہ میونسپل کارپوریشن کے وارڈز، میونسپل کمیٹی، ٹاؤن کمیٹی، ضلع کونسل اور یونین کونسل کی نشستوں پر انتخابات ہورہے ہیں۔ایک میونسپل کمیٹی 9 ٹاؤن کمیٹی پر مشتمل ہیں جبکہ ڈویژن میں ضلع کونسل کی 116 اور یونین کونسل کی 118 نشستیں ہیں۔الیکشن کمیشن کے مطابق میرپور ڈویژن میں کل ووٹرز کی تعداد 12 لاکھ 38 ہزار سے زائد ہے جبکہ 222 پولنگ اسٹیشن حساس ترین قرار دیے گئے ہیں۔