غرب اردن،خالی کرائی گئی حومش یہودی بستی میں ڈانس پارٹی کا انعقاد

نابلس (اُردو پوائنٹ اخبارتازہ ترین - این این آئی۔ 09 دسمبر2022ء) سینکڑوں یہودی آباد کاروں نے نابلس کے شمال مغرب میں برقہ قصبے کے قریب خالی کرائی گئی حومش بستی میں رقص پارٹی کا انعقاد کیا۔مقامی ذرائع نے اطلاع دی کہ آباد کاروں کو لے جانے والی درجنوں بسوں نے قابض فوج کی سخت حفاظت میں حومش کے مقام پر دھاوا بول دیا۔اس نے وضاحت کی کہ آباد کاروں نے جگہ جگہ رقص کی پارٹیاں منعقد کیں، جنین اور نابلس کے شہروں کے درمیان سڑک پر شہریوں کی توہین کی اور ان پر حملہ کرنے کی مشق کی۔

اسی تناظر میں قابض فوج نے نابلس اور جنین شہروں کے درمیان سڑک پر حومش بستی کے قریب ایک فوجی چوکی قائم کی۔17 ستمبر کو آباد کاروں نے ایک زبردست حملہ کیا جو تقریبا شہریوں کے خلاف قتل عام میں بدل گیا۔

(جاری ہے)

25 مکانات کو شدید نقصان پہنچانے کے باوجود دیہاتیوں نے یہودی آباد کاروں کو آگے بڑھنے سے روک دیا۔آبادکاروں کے حملے بہت زیادہ بڑھ رہے ہیں اور ان کا مرکز مقبوضہ مغربی کنارے کے شمالی علاقے ہیں۔

خاص طور پر نابلس شہر اور آس پاس بستیوں میں گھرے درجنوں دیہات یہودی آباد کاروں کی توجہ کا مرکز ہیں۔مقبوضہ مغربی کنارے اور القدس میں فلسطینیوں کے خلاف اسرائیلی خلاف ورزیوں کا سلسلہ جاری ہے، کیونکہ اسرائیلی قابض افواج نے حال ہی میں مقبوضہ مغربی کنارے میں فلسطینی نوجوانوں کو نشانہ بنانے کے لیے چھاپوں اور گرفتاریوں کی روزانہ کی مہم شروع کی ہے۔