گریمی ایوارڈ یافتہ گلوکارہ عروج آفتاب مغربی تعصبانہ رویے پر برس پڑیں

پیر 29 مئی 2023 21:42

نیویارک (اُردو پوائنٹ اخبارتازہ ترین - آن لائن۔ 29 مئی2023ء) عالمی شہرت یافتہ اور گریمی ایوارڈ یافتہ پاکستانی گلوکارہ عروج آفتاب نے مخصوص ثقافتی اور لسانی بنیاد پر آرٹسٹ کو کنارے سے لگانے پر مایوسی کا اظہار کیا۔ مائیکرو بلاگنگ سائٹ ٹوئٹر پر خود کو اردواور پاکستانی گلوکارہ‘ کہنے والوں سے ناراضی کا اظہار کیا تو سوشل میڈیا پر نئی بحث چھیڑ گئی ہے۔

عروج آفتاب نے ٹوئٹ کرتے ہوئے لکھا کہ پاکستانی گلوکارہ عروج آفتاب ، اردو گلوکارہ عروج آفتاب، عروج آفتاب کی حیرت انگیز اردو گائیکی، کیا یہ ٹھیک ہے۔ کیا موسیقار رنگن اور نسل سے بڑھ کر ہوسکتا ہے۔ کیا اس پر کوئی ٹیگ لگانا ضروری ہے گریمی ایوارڈ یافتہ گلوکارہ کی جانب سے اس ٹوئٹ نے سوشل میڈیا پر نئی بحث چھیڑ دی۔

(جاری ہے)

کئی صارفین نے ان کے مذکورہ ٹوئٹ کی وجہ سے قیاس آرائیاں شروع کر دیں کہ عروج آفتاب خود کو پاکستانی کہلائے جانے یا اردو بولنے پر شرمندہ ہیں۔

اسی سبب انہیں کئی سوشل میڈیا صارفین کی جانب سے کڑی تنقید کا نشانہ بھی بنایا گیا۔تاہم بعدازاں انہوں نے مزید ٹوئٹ کرتے ہوئے وضاحت پیش کی کہ میں پاکستان مخالف نہیں ہیں اور نہ ہی اپنی جڑوں یا ورثے کو کو مٹانے یا ترک کرنے کی بات کر رہی ہوں بلکہ میں اپنا تجربہ بیان کر رہی ہوں کہ برطانیہ اور یورپ کے دورے کے دوران مجھے ایسا محسوس ہوتا ہے جیسے لسانیت کی بنیاد پر مجھے پیچھے دھکیلا جا رہا ہو۔

انہوں نے نام لئے بغیر مغرب کی جانب اشارہ کرتے ہوئے مزید لکھا کہ انہیں جغرافیائی اور لسانی بنیاد پر کسی کو کنارے سے لگانے کی اجازت ہے، ان کے لئے بہت آسان ہے کہ کسی کی کامیابیوں کو مکمل طور پر نظر انداز کرکے صرف اس بنیاد پر پیچھے دھکیل دیں اور مستقبل میں بھی آگے بڑھنے سے روکیں۔سوشل میڈیا صارفین کی جانب سے کڑی تنقید کے بعد عروج آفتاب نے اپنے ٹوئٹس پر کمینٹس کا آپشن یہ کہتے ہوئے بند کردیا کہ انہیں دل کی گہرائیوں سے اپنی جڑوں اور ثقافت سے محبت و فخر ہے اور ان کے ٹوئٹس مغربی تعصب کے حوالے سے تھے۔