آج کے جدید دور میں آئی ٹی کی تعلیم حاصل کرنا بہت اہم ،نوجوانوں کو زیادہ سے زیادہ راغب ہونا چاہیے ‘بلیغ الرحمن

لاہور (اُردو پوائنٹ اخبارتازہ ترین - این این آئی۔ 23 ستمبر2023ء) گورنر پنجاب محمد بلیغ الرحمن نے گورنر ہائوس لاہور میں اخوت سینٹر فار انفارمیشن ٹیکنالوجی اینڈ ووکیشنل ایجوکیشن پروگرام کے دوسرے مرحلے کے افتتاح کے حوالے سے منعقدہ تقریب میں بطور مہمان خصوصی شرکت کی۔اس موقع پر تقریب سے خطاب کرتے ہوئے گورنر پنجاب محمد بلیغ الرحمن نے کہا کہ مجھے یہ جان کر خوشی ہوئی کہ ادارہ اخوت سماجی ذمہ داری کے تحت ہزاروں طلبا و طالبات کو مفت آئی ٹی تربیت سے بہرہ مند کر رہا ہے۔

گورنر پنجاب نے کہا میں آپ سب کو خوش آمدید کہتا ہوں کہ آپ سب یہاں بہتری کے عمل کے لیے آئے ہیں اور آپ سب آگے بڑھنے کی کوشش کر رہے ہیں۔انہوں نے کہا کہ آپ کو کبھی بھی مایوس نہیں ہونا چاہیے، معاشرے کی مثبت چیزوں پر اعتماد رکھیں۔

(جاری ہے)

گورنر پنجاب نے مزید کہا کہ ہر معاشرے میں کمیاں ہوتی ہے لیکن آپ ان کمیوں پر ہی توجہ کریں گے تو آپ پھر آگے نہیں بڑھ سکتے۔

گورنر پنجاب نے کہا کہ امجد ثاقب کی اخوت فائونڈیشن کی مثال سب کے سامنے ہے کہ وہ اربوں روپے اس معاشرے پر خرچ کر رہے ہیں اور کم وسیلہ لوگوں کو بغیر کسی ضمانت کے قرض حسنہ دیتے ہیں۔ انہوں نے کہاکہ یہ بات بڑی متاثر کن ہے کہ 90۔99 فیصد لوگ یہ قرض واپس کرتے ہیں۔ یہ اس بات کی مثال ہے کہ معاشرے میں لوگوں میں احساس اور ذمہ داری موجود ہے۔گورنر پنجاب نے کہا کہ ایک پڑھا لکھا انسان تحقیق کرتا ہے اور سنی سنائی باتوں پر یقین نہیں کرتا ، آپ بھی تحقیق کریں اور پھر کسی چیز کے بارے میں رائے قائم کریں۔

انہوں نے کہا کہ آج کے جدید دور میں آئی ٹی کی تعلیم حاصل کرنا بہت اہم ہے اور نوجوانوں کو اس طرف زیادہ سے زیادہ راغب ہونا چاہیے تاکہ وہ دنیا میں کامیاب ہو سکیں۔ آئی ٹی تعلیم حاصل کرنے سے ان لائن روزگار کے ملتے ہیں۔ اخوت فانڈیشن کے چیئرمین امجد ثاقب نے اس موقع پر گفتگو کرتے ہوئے کہا گورنر پنجاب کے طلبہ و طالبات کے لیے گورنر ہائوس کے دروازے کھولنے پر شکریہ ادا کرتا ہوں۔

انہوں نے کہا اس پروگرام کے تحت دس ہزار سے زائد کم وسیلیہ گھرانوں سے تعلق رکھنے والے طلباوطالبات کو مفت آئی ٹی ٹریننگ دی جائے گی۔ مزید ازاں ایک ویب پورٹل کا بھی اجرا بھی کیا جا رہا ہے جس سے تربیت حاصل کرنے والے طلباوطالبات کا مختلف اداروں میں ملازمت کے حصول کو ممکن بنایا جائے گا۔اس موقع پر گورنر ہائوس لاہور میں اخوت اور دیگر پارٹنرز کے اشتراک سے ہزاروں طلبہ و طالبات کا آئی ٹی ٹریننگ ٹیسٹ بھی منعقد ہوا۔