ضلعی انتظامیہ کا انسداد سموگ وشہریوں میں مثبت سرگرمیوں کے فروغ کیلئے سائیکلنگ ایونٹ کا انعقاد

اتوار 26 نومبر 2023 20:10

لاہور (اُردو پوائنٹ اخبارتازہ ترین - اے پی پی۔ 26 نومبر2023ء) صوبائی دارالحکومت لاہور میں کمشنر محمد علی رندھاوا کی خصوصی ہدایت پر ایم سی ایل و ضلعی انتظامیہ نے فیملی سائیکلنگ ایونٹ سائیکل دوڑائو سموگ بھگائو کا انعقاد کیا ۔اتوار کے روز مال روڈ پر انسداد سموگ آگاہی کیلئے کمشنر آفس کے تحت چھٹا میگا سائیکل رائیڈنگ میٹ اپ اور ایونٹ تھا۔ترجمان کے مطابق کمشنر لاہورکی ہدایت پر پرائیویٹ سیکٹر کے تعاون سے انسداد سموگ،صحت مند ماحول اور شہریوں میں مثبت سرگرمیوں کے فروغ کیلئے سائیکلنگ ایونٹ منعقد ہوا۔

فیملی سائیکلنگ ایونٹ کا ٹریک لبرٹی چیرنگ کراس تا استنبول چوک اور واپس چیرنگ کراس پر اختتام پذیر ہوا۔کمشنر نے فیملی ایونٹ سائیکل رائیڈ کی قیادت کی اور ٹریک مکمل کیا۔

(جاری ہے)

ڈالفن پولیس سکواڈ، سائکلنگ گروپس،فیملیز،بچے اور میڈیا ہائوسز نے ایونٹ میں حصہ لیا۔ایل ڈی اے،ایم سی ایل،ضلعی انتظامیہ،پولیس،پی ایچ اے ،ایل ڈبلیو ایم سی اور ریسکیو 1122 نے بھی فیملی سائیکلنگ ایونٹ میں حصہ لیا۔

اس موقع پر کمشنر لاہور کا کہنا تھا کہ شہری اپنی سائیکل ساتھ لائے اور خوبصورت فیملی ایونٹ میں حصہ لے کر صحت مند ماحول کیلئے اپنی وابستگی کا مظاہرہ کیا۔انہوں نے کہاکہ حکومت پنجاب کی الیکٹرک بائیکس کے حوالے سے پالیسی وضع ہوچکی اورمختلف اقدامات کے ساتھ ساتھ صحت مند ماحول کلچر کے فروغ کیلئے ایونٹس پر بھی کام جاری ہے۔انہوں نے کہا کہ سائیکلنگ ایونٹ کا مقصد شہر میں صحت مند ماحول کے متعلق آگاہی، سائیکلنگ کلچر کا فروغ اور ماحولیاتی آلودگی سے تحفظ بارے آگہی فراہم کرنا ہے۔

اسی طرح شہر کی اہم شاہراہوں پر سائیکل ٹریکس و لینز مارک کی جارہی ہیں اور سائیکل سٹینڈ بھی بنائے جارہے ہیں۔انہوں نے کہا کہ لاہور شہر ہمارا گھر ہے، اس کے صحت مند ماحول کے فروغ کیلئے شہری آگے آئیں۔کمشنر لاہور کامزید کہنا تھا کہ کئی اہم روڈز پر بائی سائیکل کے لیے گرین لائن مختص کی جارہی ہے، سائیکلنگ ایونٹس کو کیلنڈر آف ایئر میں شامل کرکے ایک مستقل سیریز آف سائیکلنگ ایونٹس شروع کی جائیں گی۔

انہوں نے کہا کہ لاہور ہائی کورٹ کی جانب سے شہر میں صحت مند سرگرمیوں کے فروغ کیلیے ہدایات واضح ہیں،ٹیپا اور ٹریفک پولیس کو شہر میں گرین لائنز بنانے کیلئے ورکنگ پلان تیار کرنے کی ہدایت کی ہے۔کمشنر لاہور نے واضح کیا کہ انسداد سموگ کے تحت ٹریفک روانی ہجوم کو ختم کرنے کیلئے شہر کے 135چوراہوں کو توسیع دی جارہی ہے ۔اس موقع پرکمشنرمحمد علی رندھاوا اور افسران نے بھی سائیکلنگ کی۔