سعودی پبلک انویسٹمنٹ فنڈ کا ہیتھرو ایئرپورٹ کے دس فیصد شیئرز خریدنے کا معاہدہ

جمعرات 30 نومبر 2023 09:40

ریاض (اُردو پوائنٹ اخبارتازہ ترین - اے پی پی۔ 30 نومبر2023ء) سعودی عرب کے پبلک انویسٹمنٹ فنڈ (پی آئی ایف)نے ہسپانوی انفراسٹرکچر کمپنی فیروویل سے لندن کے ہیتھرو ایئرپورٹ کے دس فیصد شیئرز کی خریداری کا معاہدہ کیا ہے۔ عرب نیوز کے مطابق پی آئی ایف نے ہیتھرو ایئرپورٹ کے شیئرز کی خریداری کا فیصلہ اس وقت کیا جب ایئرپورٹ کے 25 فیصد شیئرز کی مالک ہسپانوی کمپنی نے اپنے شیئرز فروخت کرنے کی منظوری دی،فیروویل کا کہنا ہے کہ یہ معاہدہ تین ارب ڈالرکا ہے جبکہ پی آئی ایف نے بتایا کہ یہ خریداری اب بھی ریگولیٹری منظوری سے مشروط ہے۔

اس معاہدے کی منظوری سے برطانوی ایئرپورٹس کے آپریٹر زمیں ہسپانوی کمپنی کی سرمایہ کاری ختم ہوجائے گی جس کا آغاز 56 فیصد سے ہوا لیکن 2013 میں اسے کم کرکے 25 فیصد کردیا گیا۔

(جاری ہے)

معاہدے کے تحت سعودی پبلک انویسمنٹ فنڈ ہسپانوی کمپنی فیرووئل کے دس فیصد جبکہ فرانس میں قائم پرائیویٹ ایکویٹی فنڈ اس کے پندرہ فیصد شیئرز حاصل کرے گا۔ واضح رہے کہ ہیتھرو ایئرپورٹ کو بین الاقوامی سٹریٹجک حیثیت حاصل ہے، یہ دنیا کے مصروف ترین ایئرپورٹس میں سے ایک ہے، برطانیہ اس کے ذریعے دنیا بھر میں اپنے کاروباری پارٹنرز کے ساتھ منسلک ہے۔ مئی 2023 کے جی پی مورگن کے تخمینے کے مطابق ہیتھرو ایئرپورٹ کی مجموعی قیمت (جس میں اس کے قرضے شامل ہیں )24.3 ارب یورو (25 ارب ڈالر) ہے۔