اسرائیل نے غزہ میں ایک لاکھ عمارتیں تباہ کر دیں

اسرائیلی جارحیت کا سب سے زیادہ نشانہ شمالی غزہ رہا جہاں پٹی پر بڑے پیمانے پر تباہی پھیلی،رپورٹ

ہفتہ 2 دسمبر 2023 17:10

اسرائیل نے غزہ میں ایک لاکھ عمارتیں تباہ کر دیں

مقبوضہ غزہ(اُردو پوائنٹ اخبارتازہ ترین - این این آئی۔ 02 دسمبر2023ء) غزہ میں اسرائیلی بربریت کی گواہی اور ثبوت مغربی میڈیا خود دے رہا ہے، برطانوی ٹی وی کی جانب سے غزہ کی سیٹلائٹ تصاویر سامنے آئی ہیں جن سے ظاہر ہوتا ہے کہ صہیونی بمباری سے ایک لاکھ کے قریب عمارتیں تباہ ہو گئی ہیں۔غزہ کے طول و عرض میں پھیلی تباہی کے مناظر اسرائیلی مظالم کی داستاں بیان کر رہے ہیں، اسرائیلی بمباری نے غزہ کا نقشہ بدل کر رکھ دیا ہے۔

(جاری ہے)

مساجد، رہائشی عمارتوں، اسپتالوں کو چن چن کر نشانہ بنایا گیا، برطانوی ٹی وی کی طرف سے گزشتہ جمعرات (عارضی جنگ بندی سے قبل)کو لی گئی سیٹلائٹ تصاویر غزہ میں تباہی کی شدت کو ظاہر کرتی ہیں، رپورٹ کے مطابق کہ ان تصاویر ظاہر ہوتا ہے کہ تقریبا 98,000 عمارتوں کو نقصان پہنچا ۔ڈرون فوٹیج اور تصدیق شدہ ویڈیو میں یہ بھی دکھایا گیا ہے کہ اسرائیلی فضائی حملوں اور زمینی لڑائی کے بعد عمارتیں اور پورے کے پورے محلے ملبے کا ڈھیر بن گئے ہیں۔ اسرائیلی جارحیت کا سب سے زیادہ نشانہ شمالی غزہ رہا جہاں پٹی پر بڑے پیمانے پر تباہی پھیلی ہے۔