احد چیمہ کو آمدن سے زائد اثاثہ جات کیس میں بری کر دیا گیا

احتساب عدالت لاہور نے بریت کی درخواستوں پر محفوظ فیصلہ سنا دیا

مقدس فاروق اعوان جمعہ 8 دسمبر 2023 11:29

احد چیمہ کو آمدن سے زائد اثاثہ جات کیس میں بری کر دیا گیا

لاہور( اُردو پوائنٹ اخبارتازہ ترین ۔ 08 دسمبر 2023ء ) احتساب عدالت لاہور نے مشیر وزیراعظم احد چیمہ کو آمدن سے زائد اثاثہ جات کیس میں بری کر دیا۔احتساب عدالت نے بریت کی درخواستوں پر محفوظ فیصلہ سنا دیا۔وزیراعظم کے مشیر احد چیمہ احتساب عدالت پہنچے۔عدالت نے احد چیمہ کی بریت کی درخواست پر فیصلہ محفوظ کررکھا تھا۔عدالت نے وکلاء کے دلائل مکمل ہونے کے بعد فیصلہ محفوظ کیا تھا۔

احتساب عدالت کے جج ملک علی ذوالقرنین اعوان محفوظ فیصلہ سنایا۔عدالت نے احد چیمہ کو آمدن سے زائد اثاثہ جات کیس میں بری کر دیا۔ آمدن سے زائد اثاثہ جات ریفرنس میں احد چیمہ کی بریت کی درخواست پر نیب کی جمع کرائی گئی رپورٹ میں کہا گیا تھا کہ احد چیمہ کے خلاف آمدن سے زائد اثاثوں کا نیب ریفرنس نہیں بنتا، احد چیمہ کے تمام اثاثے ان کی آمدن سے مطابقت رکھتے ہیں، احد چیمہ کے مبینہ بے نامی داروں نے اپنی ذاتی انکم سے پراپرٹیز بنائیں، احد چیمہ کے مبینہ بے نامی داروں کی پراپرٹیز کو احد چیمہ سے لنک نہیں کیا جا سکتا۔

(جاری ہے)

رپورٹ میں نیب نے مؤقف اختیار کیا تھا کہ احد چیمہ کے رشتہ داروں سعدیہ منصور، منصور احمد اور نازیہ اشرف کے اکاؤنٹس احد چیمہ کے بے نامی اکاؤنٹس نہیں، ری انویسٹی گیشن کے مطابق وزیراعظم کے معاون خصوصی کی کل آمدن 213 ملین اور اخراجات 131 ملین ہیں۔ نیب نے کہا ہے کہ احد چیمہ کے بنائے گئے اثاثے ان کی آمدن کے مطابق ہی ہیں، ری انویسٹی گیشن کے دوران نگران وزیراعظم کے مشیر نے اپنی انکم اور منافع سے متعلق ریکارڈ نیب کو فراہم کیا، احد چیمہ کی جانب سے جمع کرائے گئے ریکارڈ کی تصدیق کی گئی تو ریکارڈ درست ثابت ہوا۔قبل ازیں احتساب عدالت نے احمد چیمہ اور فواد حسن فواد سمیت 10 ملزمان کی آشیانہ اقبال ریفرنس سے بریت کی درخواستیں منظور کرلی تھیں۔