متنازع تشہیری مہم، اشنا شاہ کی ملبوسات کے برانڈ کے بائیکاٹ کی حمایت

پیر 11 دسمبر 2023 20:10

کراچی (اُردو پوائنٹ اخبارتازہ ترین - آن لائن۔ 11 دسمبر2023ء) فلسطین اور غزہ کے شہداء کے لیے مسلسل آواز بلند کرنے والی پاکستان شوبز انڈسٹری سے وابستہ معروف اداکارہ اشنا شاہ نے متنازع تشہیری مہم کے باعث ملبوسات کے عالمی برانڈ کے بائیکاٹ کی حمایت کر دی۔مذکورہ فیشن برانڈ نے موسمِ سرما کی مناسبت سے جیکٹس لانچ کی ہیں، جس کے لیے انہوں نے فلسطینیوں کی نسل کشی اور ان کی تکلیف و مصائب کو تشہیری مہیم کے لیے استعمال کیا ہے۔

سوشل میڈیا صارفین نے فیشن برانڈ کے بائیکاٹ کا مطالبہ کرتے ہوئے سوالات کھڑے کر دیے کہ کیا کوئی چیک اور بیلنس نہیں ہے۔ ایسے میں سماجی رابطے کی ویب سائٹ ایکس پر پوسٹ کرتے ہوئے اداکارہ اشنا شاہ نے بھی مذکورہ برانڈ کے بائیکاٹ کی حمایت کرتے ہوئے اس تشہیری مہم کے خیال پر افسوس کا اظہار کیا ہے۔

(جاری ہے)

انہوں نے لکھا ہے کہ تو اب ہم کیا کریں ۔ ان کے جو کپڑے ہمارے پاس پہلے سے موجود ہیں کیا ہم انہیں پھینک دیں یا پھر نئے کپڑے نہ خریدنا کافی ہے۔

اشنا شاہ نے لکھا ہے کہ میرے خیال سے چونکہ ان کے کپڑوں پر لوگو موجود نہیں ہے اس لیے جو کپڑے پہلے سے خرید چکے ہیں وہ استعمال کرنے میں کوئی قباحت نہیں ہے لیکن ظاہر ہے اب ہم ان کے نئے کپڑے تو نہیں خریدیں گے۔اس پوسٹ کے حوالے سے مختلف سوشل میڈیا صارفین بھی اداکارہ کی حمایت کرتے دکھائی دیے ہیں۔