فریال مخدوم کا لباس پر تنقید کرنے والوں کو جواب

ریڈ سی فلم فیسٹیول میں مدعو تھی، وہاں سے گھنٹہ دوری پر موجود مکہ میں عمرہ بھی ادا کرلیا،فیسٹیول کیلئے لباس کا انتخاب پہلے سے ہی کیا ہوا تھا، پوسٹ

پیر 11 دسمبر 2023 21:57

فریال مخدوم کا لباس پر تنقید کرنے والوں کو جواب

نیو یارک (اُردو پوائنٹ اخبارتازہ ترین - این این آئی۔ 11 دسمبر2023ء) پاکستانی نژاد برطانوی باکسر عامر خان کی اہلیہ فریال مخدوم عمرے کی ادائیگی کے بعد ریڈ سی فلم فیسٹیول میں شرکت کیلئے منتخب کردہ لباس کی وجہ سے ایک بار پھر شدید تنقید کا شکار ہو گئیں۔حال ہی میں ریڈ سی فلم فیسٹیول کا سعودی عرب کے شہر جدہ میں انعقاد ہوا جس میں دنیا بھر سے کئی مشہور شخصیات نے شرکت کی۔

تقریب میں باکسر عامر خان نے اپنی اہلیہ فریال مخدوم کے ساتھ شرکت کی۔فریال مخدوم نے فیسٹیول میں شرکت کرنے کیلئے سلور ریشمی گائون پہنا تھا لیکن یہ گاون نامناسب سٹائل کی وجہ سے سوشل میڈیا صارفین کو بالکل پسند نہیں آیا۔جو بات بظاہر سوشل میڈیا صارفین کو اچھی نہیں لگی وہ عمرہ کرنے کے فورا بعد فریال کا ایسے لباس کا انتخاب تھا۔

(جاری ہے)

عمرے کے دوران مکہ مکرمہ میں لی گئی اپنی تصاویر شیئر کرنے کے ایک دن بعد جب فریال مخدوم نے فلم فیسٹ سے اپنی تصاویر اور ایک ویڈیو شیئر کی تو سوشل میڈیا صارفین نے کمنٹ سیکشن میں ان کے لباس کے انتخاب پر شدید تنقید کی۔

فریال مخدوم نے سوشل میڈیا پر ناقدین کو جواب دیتے ہوئے لکھا کہ اگرچہ مجھے کسی کو کچھ سمجھانے کی ضرورت نہیں ہے لیکن پھر بھی میں نے سوچا کہ میں ایک بات واضح کر دوں کہ میں اس سے پہلے بھی کئی بار عمرے پر جا چکی ہوں لیکن اس بار میں نے عمرہ کرنے کا پہلے سے ارادہ نہیں کیا ہوا تھا۔انہوں نے لکھا مجھے ریڈ سی فلم فیسٹیول میں مدعو کیا گیا تھا اس لئے میں وہاں موجود تھی تو مکہ مکرمہ بھی چلی گئی جو وہاں سے 1گھنٹے کی دوری پر ہے جبکہ فلم فیسٹیول کیلئے لباس کا انتخاب میں نے پہلے سے ہی کیا ہوا تھا۔