پاکستان اسٹیل ملز قومی اثاثہ ہے ،نجکاری مافیا سے بچایا جائے،روس کی مدد سے ایک بار پھر اسٹیل ملز کو بحال کیا جاسکتا ہے ،الطاف شکور

کراچی(اُردو پوائنٹ اخبارتازہ ترین - این این آئی۔ 31 دسمبر2023ء) پاسبان ڈیموکریٹک پارٹی کے چیئرمین الطاف شکورنے کہا ہے کہ پاکستان اسٹیل ملز کی زمین پر انڈسٹریل پارک کے قیام سے معیشت کو فروغ دینے میں مدد ملے گی،پاکستان اسٹیل ملز کی بحالی بہترین آپشن ہے ،بصورت دیگر، اس کی وسیع اراضی کو مجوزہ صنعتی پارک کے قیام کے لیے استعمال کیا جانا چاہیے،اسٹیل انڈسٹری دنیا کی سب سے زیادہ منافع بخش صنعتوں میں سے ایک ہے،اسٹیل ملز ایک انتہائی منافع بخش مل تھی لیکن سیاسی لیڈروں کے بھیس میں ایک مافیا نے پاکستان مخالف آقاؤں کے منصوبے کے تحت اسے نقصان پہنچاکر بند کروا دیا،بندش کے باوجود حکومت اب بھی اپنے ملازمین کی تنخواہیں ادا کرتی ہے جس کا مطلب ہے کہ قومی معیشت کا مسلسل نقصان اٹھا رہی ہے،پاکستان اسٹیل ملز کی منظم تباہی اس بات کا ثبوت ہے کہ کس طرح پاکستان مخالف قوتوں کے معاشی زدہ لوگ سیاسی رہنماؤں اور سیاسی جماعتوں کے بھیس میں اس ملک میں کام کرتے ہیں،افسوس کی بات ہے کہ ہماری اسٹیبلشمنٹ اب بھی ان خفیہ غیر ملکی ایجنتوں پر انحصار کرتی ہے،روس کی مدد سے پاکستان اسٹیل ملز کو بحال کیا جا سکتا ہے جو یہاں ایک جدید سٹیل مل کے قیام میں مدد کرنے میں دلچسپی رکھتا ہے۔

(جاری ہے)

پاسبان اسٹیئرنگ کمیٹی کی میٹنگ میںپاکستان اسٹیل ملز کی زمین پر انڈسٹریل پارک کے قیام کے خیال کا خیر مقدم کرتے ہوئے الطاف شکور نے کہا کہ یہ ایک قومی اثاثہ ہے اسے نجکاری مافیا سے بچایا جائے۔ اسٹیل ملز کی زمین کو کچھ مقامی اور بین الاقوامی رئیل اسٹیٹ ٹائیکون مونگ پھلی کے لیے حاصل کرکے کھربوں روپے کا منافع کمانا چاہتے ہیں۔ وفاقی حکومت چین پاکستان اقتصادی راہداری سی پیک کے تحت پاکستان اسٹیل ملز کے 1500ایکڑ رقبے پر صنعتی پارک کے قیام کے لیے سندھ حکومت سے تعاون کی کوشش کر رہی ہے۔

یہ خیال اصل میں پاکستان مسلم لیگ (ن )کی حکومت نے 2017 میں پیش کیا تھا۔ اسے سنٹرل ڈویلپمنٹ ورکنگ پارٹی (سی ڈی ڈبلیو پی) نی2021 میں منظور کیا تھا۔اب ہمیں اپنے دوستوں اور دشمنوں کو پہچاننے کے قابل ہونا چاہئے اور پاکستان میں کام کرنے والے معاشی طور پر متاثرہ افراد کے چہروں سے پردہ اٹھانا چاہئے۔