مشکل وقت میں مدد کرنے پر منیب بٹ کا عبد اللہ کادوانی اور اسد قریشی سے اظہار تشکر

منگل 2 جنوری 2024 19:50

کراچی (اُردو پوائنٹ اخبارتازہ ترین - این این آئی۔ 02 جنوری2024ء) اداکار منیب بٹ نے مشکل وقت میں مدد کیلئے ہاتھ بڑھانے پر پروڈیوسر عبداللہ کادوانی اور اسد قریشی کا خصوصی طور پر شکریہ ادا کیا ہے۔منیب بٹ نے حال ہی میں ایک پوڈکاسٹ میں بطور مہمان شرکت کی جہاں انہوں نے کچھ عرصے قبل گھر میں ہونیوالے خوفناک سلنڈر بلاسٹ بارے بتایا جس میں کافی نقصان ہوا تھا۔

انہوں نے بتایا کہ میرے گھر میں جب دھماکہ ہوا تو وہ اتنا زوردار تھا کہ میرے کمرے کی چھت گر گئی تھی لیکن اللہ کا شکر ہے کہ چھت گرنے سے پہلے ہی ہم لوگ اس کمرے سے باہر آگئے تھے جس کے باعث کوئی جانی نقصان نہیں ہوا۔منیب بٹ نے کہا کہ میں اس واقعے کے بعد سب سے زیادہ اپنی انڈسٹری کے لوگوں اور بالخصوص عبداللہ کادوانی اور اسد قریشی کا شکر گزار ہوں۔

(جاری ہے)

انہوں نے بتایا کہ مجھے اس وقت کافی لوگوں کی کال آئی لیکن عبداللہ کادوانی نے مجھے کال کرکے کہا کہ دیکھو تمہیں کسی بھی چیز کی ضرورت ہو تو سوچنا مت فورا بتا دینا جبکہ اسد قریشی نے تو یہاں تک کہہ دیا کہ میں تمہاری فیملی کیلئے کچھ دنوں کیلئے ایک ہوٹل میں بکنگ کروا دیتا ہوں تم اپنی فیملی کے ساتھ وہاں شفٹ ہوجائو۔منیب بٹ نے بتایا کہ اسد قریشی صاحب کی یہ پیشکش سن کر میں نے کہا کہ آپ نے میرے بارے میں اتنا سوچا آپ کا بہت شکریہ لیکن گھر میں ہمارا سامان بھی ہے تو ایسے گھر کو چھوڑ کر جانا مناسب نہیں ہے تو ہم لوگ یہیں گزارا کر لیں گے۔انہوں نے کہا کہ یہ سب دیکھ کر اچھا لگا خوشی ہوئی کہ ہماری انڈسٹری کے سینئر لوگ دوسروں کا اتنا خیال کرنے والے ہیں۔