سٹرنگز کا33برس کا سفر 5سیکنڈز میں ختم کیا ، بلال مقصود

میرے اور فیصل میں کبھی کوئی جھگڑا نہیں ہوا، اچھے دوست مگر کبھی ایک ساتھ کسی پراجیکٹ میں نظر نہیں آئیں گے،انٹرویو

بدھ 3 جنوری 2024 06:10

سٹرنگز کا33برس کا سفر 5سیکنڈز میں ختم کیا ، بلال مقصود

کراچی (اُردو پوائنٹ اخبارتازہ ترین - این این آئی۔ 03 جنوری2024ء) گلوکار و موسیقار بلال مقصود نے کہا ہے کہ اسٹرنگز کا 33برس کا سفر 5سیکنڈز میں ختم کرنے کا فیصلہ کرلیا تھا۔میڈیا رپورٹ کے مطابق حال ہی میں موسیقار بلال مقصود نے فیشن میگزین کے پوڈکاسٹ میں شرکت کی جہاں انہوں نے بینڈ کو ختم کرنے کے حوالے سے کھل کر گفتگو کی۔انہوں نے ایک سوال کا جواب دیتے ہوئے کہا کہ میرے اور فیصل کپاڈیا کیلئے اسٹرنگز ہمیشہ سے بہت خاص تھا اور ہم اچھی طرح جانتے ہیں کہ ہر عروج کو زوال ہوتا ہے۔

انہوں نے کہا کہ ہم دونوں نے یہ پہلے ہی سوچ لیا تھا کہ اسٹرنگز بینڈ کو اس کے عروج پر ہی ختم کریں گے اور یہ کام ہمارے لئے کووڈ نے آسان کر دیا تھا۔انہوں نے بتایا کہ جب کورونا کے دوران ہم ایک بھی گانا نہیں بنا سکے تھے تو پہلے سوچا کہ ہم دو سال کا بریک لے لیتے ہیں لیکن پھر ہم سب نے مل کر مشورہ کیا کہ ہم اسٹرنگز بینڈ کو ختم ہی کردیتے ہیں اور یہ فیصلہ ہم نے صرف 5 سیکنڈز میں لیا۔

(جاری ہے)

گلوکار نے کہا کہ سٹرنگز کو 33برس ہوگئے تھے اور اس فیصلے سے ہمارا بینڈ اپنے زوال پر نہیں بلکہ عروج پر ہی ختم ہوا۔بلال مقصود نے بتایا کہ میرے اور فیصل کے درمیان کبھی کوئی جھگڑا نہیں ہوا، ، ہم آج بھی اچھے دوست ہیں لیکن ہم کبھی بھی ایک ساتھ کسی پراجیکٹ میں نظر نہیں آئیں گے، آج بھی جب سٹرنگز کے اکائونٹ میں پیسے آتے ہیں تو فیصل آکر مجھے چیک دے جاتا ہے، سٹرنگز کے تمام مالی معاملات ہمیشہ سے وہی سنبھالتا آیا ہے۔