ایران کا بیرونی جارحیت کا بھرپورجواب دینے کا اعلان

بدھ 31 جنوری 2024 20:36

تہران (اُردو پوائنٹ اخبارتازہ ترین - آن لائن۔ 31 جنوری2024ء) ایران نے ان کی سرزمین کے خلاف جارحیت کی صورت میں فیصلہ کن کارروائی کا اعلان کردیا۔غیر ملکی خبر رساں اداروں کی رپورٹ کے مطابق اقوام متحدہ میں ایرانی مندوب عامر سعید نے ایک بیان میں خبردار کیا کہ ایران اپنی سرزمین، اپنے مفادات یا اپنی سرحدوں سے باہر سے شہریوں کے خلاف ہونے والے کسی بھی حملے کا فوری جواب دے گا۔

(جاری ہے)

واضح رہے کہ ایرانی مندوب کا بیان ایسے وقت میں سامنے آیا ہے جب کہ امریکی قومی سلامتی کے ترجمان جان کربی نے اردن حملے کا ذمہ دار ایران کو قرار دیا تھا جب کہ امریکی صدر جو بائیڈن نے ایک بیان میں کہا تھا کہ ابھی ہم اس حملے کے حوالے سے حقائق اکٹھا کر رہے ہیں لیکن ہم جانتے ہیں کہ یہ حملہ شام اور عراق میں سرگرم ایران کے حمایت یافتہ شدت پسند گروپوں نے کیا ہے۔ ادھر امریکی صدر جوبائیڈن نے اپنے ایک اور بیان کہا کہ امریکا نے طے کرلیا ہے کہ اردن حملے میں 3 فوجیوں کی ہلاکت پر جواب کیسے اور کب دینا ہے۔امریکی صدر نے کہا تھا کہ امریکا مشرقِ وسطیٰ میں کشیدگی بڑھانا نہیں چاہتا، امریکا کو مشرق وسطیٰ میں وسیع جنگ کی ضرورت نہیں ہے۔