کویت میں صرف 2 دینار کے تنازعہ پر دکاندار کی جان چلی گئی

دکاندار نے رقم کا مطالبہ کیا تو ملزم نے اس کا بازو گاڑی کی کھڑکی میں پھنسا کر تقریباً 30 میٹر تک گھسیٹا، جس سے وہ شدید زخمی ہو کر دم توڑ گیا

ساجد علی جمعرات 30 جولائی 2026 12:14

کویت میں صرف 2 دینار کے تنازعہ پر دکاندار کی جان چلی گئی

کویت سٹی (اُردو پوائنٹ اخبارتازہ ترین۔ 30 جولائی 2026ء) خلیجی ملک کویت کی ایک عدالت نے معمولی رقم کے تنازعہ پر دکاندار کی ہلاکت کے مقدمے میں ایک شہری کو 15 سال قید با مشقت کی سزا برقرار رکھتے ہوئے فوری طور پر اس پر عملدرآمد کا حکم دے دیا، عدالت نے قرار دیا کہ اگرچہ ملزم کی جانب سے قتل کی نیت ثابت نہیں ہوسکی، تاہم اس کے تشدد کے نتیجے میں لگنے والی شدید چوٹیں دکاندار کی موت کا سبب بنیں، جس پر سخت سزا برقرار رکھی گئی۔

گلف نیوز کے مطابق یہ واقعہ کویت کے علاقے المطلع میں پیش آیا، جہاں ایک گروسری اسٹور کے مالک نے ملزم سے دکان سے خریدے گئے سامان کے 2 کویتی دینار ادا کرنے کا مطالبہ کیا، لیکن رقم کی ادائیگی سے انکار کرتے ہوئے ملزم نے دکاندار پر حملہ کردیا، اس کا بازو اپنی گاڑی کی بند کھڑکی میں پھنسا لیا اور گاڑی تقریباً 30 میٹر تک چلاتا رہا، جس کے باعث دکاندار سڑک پر گھسٹتا رہا، بعد ازاں وہ شدید زخمی حالت میں زمین پر گرگیا اور زخموں کی تاب نہ لاتے ہوئے دم توڑ گیا۔

(جاری ہے)

معلوم ہوا ہے کہ استغاثہ نے ابتدا میں ملزم پر ارادتاً قتل اور تشدد کے ذریعے ڈکیتی کی دفعات کے تحت فرد جرم عائد کی تھی، تاہم فوجداری عدالت نے شواہد کا جائزہ لینے کے بعد قتلِ عمد کی دفعات تبدیل کرتے ہوئے قرار دیا کہ ملزم کا مقصد قتل کرنا نہیں تھا، لیکن اس کے تشدد کے باعث ہونے والی چوٹیں ہی دکاندار کی موت کا سبب بنیں، اسی بنیاد پر عدالت نے ملزم کو 15 سال قید با مشقت کی سزا سنائی، جسے بعد ازاں عدالت نے اپیل بھی برقرار رکھا۔

تحقیقات کے دوران عدالت کو بتایا گیا کہ ملزم کا ماضی بھی منشیات اور چوری کے مقدمات سے جڑا رہا ہے، گرفتاری سے بچنے کے لیے اس نے اپنی گاڑی پر چوری شدہ نمبر پلیٹیں لگا رکھی تھیں اور واقعے کے بعد شناخت چھپانے کی غرض سے گاڑی کا رنگ بھی تبدیل کردیا تھا، تاہم تحقیقات کے بعد اسے گرفتار کرلیا گیا۔