خیبرپختونخوا ، 16 امیدواروں نے انتخابی نتائج کے خلاف عدالت میں درخواست دے دی

بدھ 14 فروری 2024 11:10

پشاور (اُردو پوائنٹ اخبارتازہ ترین - اے پی پی۔ 14 فروری2024ء) خیبرپختونخوا میں اب تک 16 امیدواروں نے انتخابی نتائج کے خلاف عدالت میں درخواست دے دی ہیں۔سرکاری دستاویزت سے تیار شدہ رپورٹ کے مطابق 3 قومی اور 13 صوبائی حلقوں کے نتائج کے خلاف آزاد امیدواروں نے رٹ دائر کی ہے، قومی اسمبلی کا حلقہ این اے 28 پشاور، این اے 11 شانگلہ اور این اے 40 نارتھ وزیرستان کے نتائج کو چیلنج کیا گیا ہے۔

(جاری ہے)

رپورٹ کے مطابق صوبائی دارالحکومت پشاور کے 8 صوبائی حلقوں کے نتائج کو بھی عدالت میں چیلنج کیا گیا ہے، پی کے 73، پی کے 74، پی کے 75، پی کے 78 ، پی کے 79، 80، 82 ،20 اور پی کے 21کے خلاف بھی عدالت سے رجوع کیا گیا ہے۔الیکشن کمیشن کا کہنا ہے کہ بنوں کے دو صوبائی حلقوں پی کے 101 اور 102 کے خلاف بھی آزاد امیدواروں نے نتائج مسترد کرتے ہوئے عدالت میں درخواستیں دائر کردی ہیں۔واضح رہے 8 فروری کو ہونے والے عام انتخابات میں ملک بھر میں متعدد امیدواروں نے مبینہ طور پر دھاندلی کے الزامات لگاتے ہوئے نتائج کے خلاف درخواستیں دائر کرنا شروع کردی ہیں۔