جنگی جرائم کے بعد امن کی بات کرتے ہوئے شرم آنی چاہیے، ہیلری کلنٹن پر تقریب کے دوران شدید تنقید

برلن(اُردو پوائنٹ اخبارتازہ ترین - آن لائن۔ 21 فروری2024ء) سابق امریکی صدر بل کلنٹن کی اہلیہ اور سابقہ سیکریٹری اسٹیٹ ہیلری کلنٹن کو جرمنی میں ایک تقریب کے دوران انسانی حقوق اور حقوقِ نسواں کے بارے میں بات کرنے پر شدید تنقید کا سامنا کرنا پڑا۔ غیرملکی خبررساں ادارے کے مطابق ہیلری کلنٹن نے جرمنی کے دارالحکومت برلن میں انسانی حقوق کے لیے کام کرنے والی تنظیم سینما فار پیس کے لیے ایک تقریب میں شرکت کی۔

اس تقریب کے دوران جب ہیلری کلنٹن نے سینما کی مدد سے انسانی حقوق کے لیے آواز اٹھانے کے بارے میں بات کی تو تقریب میں موجود کچھ شرکا برہم ہوگئے اور ہیلر کلنٹن کی بات کاٹتے ہوئے انہیں شدید تنقید کا نشانہ بنایا۔اس واقعے کی ویڈیو سوشل میڈیا پر وائرل ہو رہی ہے جس میں شرکا کو ہیلری کلنٹن پر تنقید کے نشتر برساتے ہوئے دیکھا جاسکتا ہے۔

(جاری ہے)

تقریب میں موجود شرکا نے ہیلری کلنٹن پر تنقید کرتے ہوئے کہا کہ انسانی حقوق کے تحفظ کے نام پر فلسطینیوں کی نسل کشی، پاکستان میں ہزاروں افراد کے قتل، افغانستان اور عراق سمیت پورے مشرقِ وسطی میں جنگی جرائم کا ذمہ دار ہونے کے بعد آپ کو انسانی حقوق کے بارے میں بات کرتے ہوئے شرم آنی چاہیے۔

تقریب کے شرکا کی جانب سے فلسطین کی آزادی کا مطالبہ بھی کیا گیا جس کے بعد ہیلری کلنٹن نے شدید غم و غصے کا شکار شرکا کو جواب دیتے ہوئے کہا کہ اگر آج یرغمالیوں کو حماس سے رہائی مل جاتی ہے تو کل ہی غزہ میں جنگ بندی ہو سکتی ہے۔انہوں نے مزید کہا کہ اس طرح آپ کے چیخنے چلانے سے مسائل حل نہیں ہو سکتے۔