شیخ رشید کا نام ای سی ایل سے نکالنے کا حکم

راولپنڈی(اردو پوائنٹ اخبارتازہ ترین۔06 مارچ2024 ء) لاہور ہائیکورٹ راولپنڈی بینچ نے شیخ رشید احمد کا نام ای سی ایل سے نکالنے کا حکم دیدیا،سیکرٹری داخلہ کی عدالت کو یقین دہانی کہ شیخ رشید کا نام ای سی ایل سے ابھی نکال رہے ہیں، نیب نے اپنے جواب میں کہا کہ سابق وزیر داخلہ شیخ رشید ہمیں کسی کیس مطلوب نہیں۔عوامی مسلم لیگ کے سربراہ اور سابق وزیر داخلہ شیخ رشید احمد کا نام ایگزٹ کنٹرول لسٹ سے نکالنے سے متعلق پٹیشن پر سماعت لاہور ہائی کورٹ راولپنڈی بینچ نے کی۔

دوران سماعت عدالت نے وزارت داخلہ حکام پر اظہار برہمی کرتے ہوئے کہا کہ آپ کے پاس 2 بجے تک کا وقت ہے، عدالت کو تحریری طور پر آگاہ کریں کہ شیخ رشید کا نام ای سی ایل سے نکالنے کے بارے میں اب تک کیا اقدامات کیے گئے ہیں۔

(جاری ہے)

جسٹس صداقت علی خان اور جسٹس مرزا وقاص روٴف پر مشتمل بینچ کے روبرو وزارت داخلہ کی جانب سے ایڈیشنل سیکرٹری اور سیکشن آفیسر ای سی ایل طلبی کے نوٹس پر حاضر ہوئے۔

بعد ازاں وقفے کے بعد شیخ رشید کا نام ای سی ایل سے نکالنے سے متعلق کیس کی سماعت دوبارہ شروع ہوئی، جس میں وفاقی سیکرٹری داخلہ عدالت میں پیش ہوئے۔ عدالت نے شیخ رشید کا نام فوری طور پر ای سی ایل سے نکالنے کا حکم دیتے ہوئے کہا کہ شیخ رشید کو عمرہ پر جانے دیا جائے۔قبل ازیں سماعت کے دورانوزارت داخلہ کے افسران نے عدالت میں بیان دیا کہ سیکرٹری داخلہ سپریم کورٹ میں مصروفیت کے باعث حاضر نہیں ہوسکے۔

عدالت کو بتایا گیا کہ سابق وزیر داخلہ کا نام گزشتہ سال 23 جون کو نیب لیٹر کی بنیاد پر ای سی ایل میں شامل کیا گیا تھا۔ نیب 190 ملین پاوٴنڈز ریفرنس میں معلومات حاصل کرنا چاہتا تھا، جس پر عدالت نے کہا کہ نیب کے مطابق شیخ رشید ملزم نہیں جب کہ 2 ملزمان پر فرد جرم عائد ہو چکی ہے تو پھر شیخ رشید کا نام کس بنیاد پر ای سی ایل میں شامل کیا گیا؟لاہور ہائی کورٹ کے راولپنڈی بینچ نے ایڈیشنل سیکریٹری داخلہ پر برہمی کا اظہار کیا تھاجبکہ وزارت داخلہ حکام نے عدالت کو بتایا کہ شیخ رشید کا نام ای سی ایل سے نکالنے کا فیصلہ نئی کابینہ کی تشکیل کے بعد ہوگا۔