کراچی (اُردو پوائنٹ اخبارتازہ ترین - اے پی پی۔ 13 مارچ2024ء) صوبائی وزیر توانائی سید ناصر حسین شاہ نے افسران کو ہدایات جاری کرتے ہوئے کہا کہ حکومت کے منشور کے مطابق عوام کو تین سو یونٹ مفت
بجلی فراہم کرنے کے منصوبے کو عملی شکل دینے کیلئے منصوبہ بندی کی رفتار کو تیز کیا جائے ۔بدھ کو جاری کردہ اعلامیہ کے مطابق ان خیالات کا اظہار انہوں نے محکمہ توانائی کے پہلے تعارفی اجلاس کی صدارت کے موقع پر اپنا خطاب میں کیا۔
انہوں نے کہا کہ عوام کو مستفید کرنے کیلئے ادارے کے تمام جاری منصوبوں کی رفتار کو تیز کیا جائے تاکہ اس کے ثمرات جلد عوام تک پہنچ سکیں۔ صوبائی وزیر نے ہدایت کی کہ تمام منصوبوں میں معیار اور میرٹ کا خاص خیال رکھا جائے۔ اس موقع پر صوبائی وزیر توانائی کو ادارے کے مختلف ڈیپارٹمنٹ کے حوالے سے تفصیلی بریفنگ دی گئی جس میں بتایا گیا کہ تھرکول بلاک ون اور بلاک ٹو سے 15.3 ملین ٹن سالانہ کوئلہ نکالا جا رہا ہے جس سے 3300 میگا واٹ
بجلی قومی گرڈ کو مہیا کی جا رہی ہے اور بڑے پیمانے پر زر مبادلہ کی بچت کی جا رہی ہے ۔
(جاری ہے)
تھرکے کوئلے کو مزید صنعتی استعمال میں لانے کے لیے اسلام کوٹ سے چھور تک 105 کلومیٹر
ریلوے ٹریک بچھایا جائے گا ۔اجلاس کو مزید بتایا گیا کہ 1845 میگا واٹ
بجلی ونڈ پاور پروجیکٹ سے پیدا کی جا رہی ہے جبکہ 150 میگا واٹ کے 36 پاور پلانٹس مکمل ہو چکے ہیں۔
عالمی بینک کے تعائون سے 400 میگا واٹ کے تین سولر پاور پروجیکٹس پر تیزی سے کام جاری ہے جن سے پیدا ہونے والی بجلی
کے الیکٹرک گرڈ سسٹم میں شامل کی جائے گی۔
اجلاس کو بتایا گیا کہ سرکاری عمارتوں کو سولر سسٹم پر منتقل کرنے کا عمل جاری ہے جبکہ اب تک 33 ہسپتالوں میں 21 میگا واٹ
بجلی سولر سسٹم کے تحت مہیا کی جا رہی ہے جبکہ 24 سرکاری عمارتوں کو 11 میگا واٹ سولر سے
بجلی فراہم کی جا رہی ہے ۔سید ناصر حسین شاہ کو مزید بتایا گیا کہ سولر سسٹم کے معیار کو جانچنے کے لیے این ای ڈی اور مہران یونیورسٹیز میں جدید لیبارٹریز قائم کی جائیں گی۔
اس موقع پر سیکرٹری توانائی مصدق احمد خان نے کہا کہ اس وقت محکمہ توانائی کے 20 ذیلی ادارے کام کر رہے ہیں جبکہ چار اہم منصوبے
تھر کول ،متبادل توانائی،
تیل اور
گیس اور الیکٹرک پاور کے منصوبوں پر کام جاری ہے ۔اجلاس میں صوبائی وزیر توانائی سید ناصر حسین شاہ، سیکرٹری توانائی مصدق احمد خان، ڈی جی کول مائنز مشتاق سومرو، ایم ڈی تھرکول انرجی بورڈ
ریاض حسین سومرو اور ڈائریکٹر متبادل توانائی محفوظ قاضی کے علاوہ محکمے کے سینیئر افسران بھی شریک تھے۔
