پاکستان میں انسانی ترقی کی درجہ بندی میں بہتری آئی ہے، اقوام متحدہ

اقوام متحدہ کے ہیومن ڈویلپمنٹ انڈیکس میں پاکستان 161 ، بنگلادیش 129 بھارت 132 ویں نمبر پر ہے،رپورٹ

جمعہ 15 مارچ 2024 16:14

پاکستان میں انسانی ترقی کی درجہ بندی میں بہتری آئی ہے، اقوام متحدہ

جنیوا(اُردو پوائنٹ اخبارتازہ ترین - این این آئی۔ 15 مارچ2024ء) اقوام متحدہ کی انسانی ترقی کے اشاریہ 2024 فہرست میں پاکستان 0.544 پوائنٹس کے ساتھ 161 ویں نمبر پر ہے جو 2023 کے مقابلے میں بہتر ہے۔ اس فہرست میں 191 ممالک شامل ہیں۔عالمی خبر رساں ادارے کے مطابق گزشتہ برس اس فہرست میں 0.540 پوائنٹس کے ساتھ پاکستان 164 ویں نمبر پر تھا تاہم رواں برس پاکستان اپنا 2013 سے 2021 کے دوران والا 161 واں نمبر واپس لینے میں کامیاب رہا۔

خیال رہے کہ اس فہرست کی تیاری کے لیے صحت، تعلیم اور آمدنی کے انڈیکس کو استعمال کیا جاتا ہے۔

(جاری ہے)

جنوبی ایشیائی ممالک میں سری لنکا سرفہرست ہے جس کا فہرست میں عالمی نمبر 73 واں ہے۔جنوبی ایشیائی ممالک میں سری لنکا کے بعد بنگلادیش (129) اور بھارت (132) کا نمبر آتا ہے۔ افغانستان اس فہرست میں 180 ویں نمبر پر ہے جب کہ نیپال 143 ویں نمبر پر کھڑا ہے۔ آخری نمبر یعنی 191 پر جنوبی سوڈان ہے۔اس طرح فہرست میں اول نمبر پر سوئٹزرلینڈ جب کہ ناروے دوسرے نمبر پر ہے۔ اس کے بعد آئس لینڈ اور ہانگ کانگ کی باری آتی ہے۔یو این ہیومن ڈویلپمنٹ انڈیکس کا کہنا تھا کہ دنیا وبائی امراض کے بعد کی سست روی سے صحت مندی کی جانب گامزن ہے لیکن امیر اور غریب ریاستوں کے درمیان فرق بڑھ رہا ہے۔