ریلوے پولیس اہلکار کا تشدد، خاتون چنی گوٹھ اسٹیشن کے قریب مردہ پائی گئی

پیر 15 اپریل 2024 17:31

کراچی (اُردو پوائنٹ اخبارتازہ ترین - این این آئی۔ 15 اپریل2024ء) ملت ایکسپریس میں ریلوے پولیس اہلکار کے تشدد کا نشانہ بننے والی خاتون چنی گوٹھ ریلوے اسٹیشن کے قریب مردہ پائی گئی۔7 اپریل کی رات ملت ایکسپریس میں ریلوے پولیس اہلکار تشدد کے بعد خاتون کو ساتھ لے گیا تھا جس کی لاش 8 اپریل کو چنی گوٹھ کے قریب سے ملی۔

(جاری ہے)

پولیس کے مطابق تشدد کی ویڈیو وائرل ہونے پر مبینہ طور پر قتل ہونے والی خاتون کی شناخت 30 سالہ مریم بی بی کے نام سے ہوئی جس کا تعلق جڑانوالہ کے چک 40 موڑ فیصل آباد سے تھا۔

خاتون پر تشدد کرنے والا ریلوے پولیس اہلکار گرفتار ہونے کے بعد ضمانت پر ہے۔ خاتون کے بھائی نے ٹیلیفون پر گفتگو کرتے ہوئے کہا کہ اس کی بہن کراچی میں بیوٹی پارلر پر ملازمت کرتی تھی اور کراچی سے عید منانے جڑانوالہ آرہی تھی۔ خاتون کے بھائی نے مطالبہ کیا کہ بہن پر تشدد کے بعد اس کی ہلاکت کی بھی تحقیقات کی جائے۔