ایچ ای سی ٹیلنٹ ہنٹ نیشنل ٹیبل ٹینس لیگ ،پنجاب اور کے پی کے کی برتری

اسلام آباد (اُردو پوائنٹ اخبارتازہ ترین - اے پی پی۔ 30 اپریل2024ء) ٹیلنٹ ہنٹ یوتھ سپورٹس نیشنل ٹیبل ٹینس لیگ کے مقابلے اسلام آباد سپورٹس کمپلیکس میں جاری ہیں، ہائر ایجوکیشن کمیشن کے زیر اہتمام ان مقابلوں کی میزبانی گورنمنٹ کالج یونیورسٹی کر رہی ہے۔ چھ روزہ مقابلوں میں ہر صوبے سے دو، دو ٹیمیں شرکت کر رہی ہیں، مقابلوں کی اختتامی تقریب 3مئی کو روڈہم ہال،سپورٹس کمپلیکس اسلام آباد میں ہو گی، دوسرے روز پنجاب اور خیبر پختونخوا کی ٹیموں نے برتری ثابت کی۔

بوائز مقابلوں میں کے پی کے بی ٹیم نے اسلام آباد بی ٹیم کو شکست دی، ایک اور میچ میں پنجاب بی ٹیم نے بلوچستان بی ٹیم کے خلاف کامیابی حاصل کی جبکہ تیسرے میچ میں پنجاب اے نے بلوچستان اے کو تین صفر سے شکست دی۔

(جاری ہے)

پنجاب بی نے فیڈرل بی کو ہرا دیا،کے پی کے اے نے سندھ اے کو شکست دی،سندھ بی کو کے پی کے ہاتھوں شکست کا مزہ چکھنا پڑا،پنجاب اے نے اسلام آباد اے کو ہرا دیا۔

آخری میچ میں کے پی کے اے نے اسلام آباد اے پر غلبہ پایا۔گرلز مقابلوں میں کے پی کے اے نے بلوچستان اے کے خلاف کامیابی حاصل کی، کے پی کے اے نے اسلام آباد اے کے خلاف فتح پائی۔ پنجاب بی نے بلوچستان بی کو زیر کیا۔پنجاب اے نے بلوچستان اے کے خلاف برتری ثابت کی۔ کےپی کے بی نے سندھ بی کو شکست دی۔کے پی کے اے نے سندھ اے کے خلاف کامیابی حاصل کی۔پنجاب بی نے اسلام آباد بی کو جبکہ پنجاب اے نے اسلام آباد اے کو ہرایا۔دوسرے دن کے آخری میچ میں اسلام آباد بی کو کے پی کے بی کے ہاتھوں شکست ہوئی۔