سیالکوٹ اربوں روپے کا قیمتی زر مبادلہ کما کر ملک کی خدمت کر رہا ہے، ڈپٹی کمشنر کا تاجر برادری سے خطاب

بدھ 8 مئی 2024 21:30

سیالکوٹ (اُردو پوائنٹ اخبارتازہ ترین - اے پی پی۔ 08 مئی2024ء) ڈپٹی کمشنر سیالکوٹ محمد ذوالقرنین نے کہا ہے کہ سیالکوٹ تیزی سے ترقی کی منازل طے کر رہا ہے اور اربوں روپے کا قیمتی زر مبادلہ کما کر ملک و قوم کی خدمت کر رہا ہے، سیالکوٹ کو رول ماڈل بنا کر دیگر اضلاع میں معاشی سرگرمیوں کو فروغ دیگر ملک کو معاشی طور پر مضبوط بنایا جاسکتا ہے،ایوان صنعت و تجارت کا سیالکوٹ کی برآمدات میں اضافہ میں اہم کردار ہے ۔

یہ بات انہوں نے ایوان صنعت و تجارت سیالکوٹ کی جانب سے اپنے اعزاز میں دیئے گئے ظہرانے سے خطاب کرتے ہوئے کہی۔ صدر ایوان صنعت و تجارت سیالکوٹ ملک عبدالغفور، ایس وی پی وہاب جہانگیر، عامر مجید کپور، ایوب خان، مریم بٹ، خاور خواجہ، اعجاز غوری، ملک ذوالفقار، لبنی تبسم، اجمل دتہ سمیت مختلف ٹریڈ یونین کے نمائندگان بھی اس موقع پر موجود تھے۔

(جاری ہے)

ڈپٹی کمشنر سیالکوٹ محمد ذوالقرنین نے کہا کہ میونسپل سروسز کے معیار کو بہتر بنانے کیلئے انفراسٹرکچر ڈویلپمنٹ کیلئے شہر میں کئی منصوبوں پر کام جاری ہے تاہم ٹریفک، تجاوزات اور صفائی ستھرائی جیسے چیلنجز سے نمٹنا اکیلے ایڈمنسٹریشن کے بس کی بات نہیں ، اس کیلئے شہریوں کو اپنی سماجی و اخلاقی ذمہ داریوں کا ادارک کرتے ہوئے آئین و قانون کی پاسداری کرنا ہوگی۔

انہوں نے کہا کہ بزنس فیسلیٹیشن سنٹر کے قیام کا مقصد سرمایہ کاروں اور بزنس کمیونٹی کو ایسا بزنس فرینڈلی ماحول فراہم کرنا ہے جس سے ان کا ایڈمنسٹریشن پر اعتماد بحال ہو اور معاشی سرگرمیوں کو فروغ ملے۔ انہوں نے کہا کہ سیف سٹی پراجیکٹ پر محدود پیمانے پر کام کا آغاز کردیا گیا ہے ، اہم چوکوں میں سی سی ٹی وی کیمروں کی تنصیب کیلئے کام جاری ہے۔ قبل ازیں صدر ایوان صنعت تجارت سیالکوٹ ملک عبدالغفور نے ڈپٹی کمشنر کو سپاس نامہ پیش کیا۔ اجلاس سے مختلف ٹریڈ یونین اور کمیٹیز کے اراکین نے بھی اظہار خیال کیا اور مسائل کی نشان دہی کی ۔

Facebook Twitter Google + Share on Whatsapp

سیالکوٹ اربوں روپے کا قیمتی زر مبادلہ کما کر ملک کی خدمت کر رہا ہے، ڈپٹی کمشنر کا تاجر برادری سے خطاب

متعلقہ عنوان :

مزید تجارتی خبریں