’پورا سیزن کھیلو ورنہ نہ آؤ‘، عرفان پٹھان کا انگلش کرکٹرز کیخلاف سخت زبان کا استعمال

ممبئی (اردو پوائنٹ تازہ ترین اخبار ۔ 16 مئی 2024ء ) ٹی ٹونٹی ورلڈکپ سے قبل پاکستان کیخلاف سیریز کیلئے انڈین پریمئیر لیگ (آئی پی ایل) ادھورا چھوڑ جانے والے انگلش کرکٹرز کیخلاف سابق بھارتی ٹیسٹ فاسٹ بولر عرفان پٹھان نے سخت زبان استعمال کرنا شروع کردی۔ سماجی رابطے کی سائٹ ایکس (ٹوئٹر) پر ٹوئٹ کرتے ہوئے سابق کرکٹر عرفان پٹھان نے لکھا کہ ’’یا تو پورے سیزن کیلئے دستیاب ہوں یا نہ آئیں!‘‘۔

قبل ازیں سابق ٹیسٹ کرکٹر سینل گواسکر بھی انڈین پریمئیر لیگ (آئی پی ایل) کو ادھورا چھوڑ جانے والے کرکٹر پر خوب گرم ہوئے تھے، انہوں نے انگلش کرکٹرز کو تنقید کا نشانہ بناتے ہوئے انکی تنخواہوں میں کٹوتی اور جرمانے لگانے کا مطالبہ کیا تھا۔ سنیل گواسکر نے اپنے کالم میں دیگر کرکٹ بورڈز کو ’احسان‘ جتلاتے ہوئے کہا تھا کہ آئی پی ایل کے باعث انہیں 10 فیصد کمیشن ملتا ہے جو کوئی اور لیگ ادا نہیں کرتی، اگر سیریز کیلئے آئی پی ایل چھوڑ رہے ہیں تو بورڈز اور کھلاڑیوں پر جرمانہ کیا جانا چاہیے۔

(جاری ہے)

واضح رہے کہ آئی پی ایل میں شریک انگلینڈ کے ٹاپ کرکٹرز جونی بیئرسٹو، سیم کرن، لیام لیونگسٹون، ول جیکس ، ریس ٹوپلی، جوس بٹلر، فل سالٹ اور معین علی پاکستان کیخلاف سیریز کے باعث آئی پی ایل چھوڑ کر ملک کی نمائندگی کیلئے وطن روانہ ہوگئے ہیں۔ پاکستان اور انگلینڈ کے درمیان 4 میچز پر مشتمل سیریز کا آغاز 22 مئی سے ہوگا جبکہ آئی پی ایل کے پلے آف سمیت فائنل اسی دوران کھیلے جائیں گے جس میں غیرملکی کرکٹرز کی بڑی تعداد شامل نہیں ہوگی۔

غور طلب بات یہ ہے کہ 2008ء میں انڈین پریمئیر لیگ (آئی پی ایل) کے آغاز سے قبل بھارت نے 2007ء میں آخری ٹی20 ورلڈکپ جیتا تھا، اس کے بعد سے وہ کوئی ٹی ٹونٹی ٹرافی جیتنے میں کامیاب نہیں ہوسکے ہیں۔ بھارت نے آخری مرتبہ 2013ء میں آئی سی سی ٹرافی جیتی تھی۔