ٹی ٹونٹی ورلڈ کپ، عماد وسیم امریکہ کیخلاف میچ سے باہر

عماد وسیم سائیڈ سٹرین میں مبتلا ہیں، امید ہے اگلے میچز کے لیے دستیاب ہوں گے : قومی کپتان

ذیشان مہتاب بدھ 5 جون 2024 11:07

ٹی ٹونٹی ورلڈ کپ، عماد وسیم امریکہ کیخلاف میچ سے باہر

ڈیلاس (اردو پوائنٹ تازہ ترین اخبار ۔ 5 جون 2024ء ) پاکستان کو ایک اہم دھچکا لگا ہے کیونکہ آل راؤنڈر عماد وسیم جمعرات 6 جون کو امریکہ کے خلاف ٹی ٹونٹی ورلڈ کپ کے پہلے میچ سے غیر حاضر ہوں گے۔ کپتان بابر اعظم نے عماد وسیم کی عدم دستیابی کی تصدیق کرتے ہوئے کہا کہ "عماد وسیم سائیڈ سٹرین میں مبتلا ہیں جس کا مطلب ہے کہ وہ ہمارے ابتدائی میچ میں نہیں کھیل سکیں گے۔

" پاکستان کرکٹ بورڈ (پی سی بی) کی میڈیکل ٹیم نے عماد کو آرام کا مشورہ دیا ہے۔ گزشتہ ماہ کے آخر میں انگلینڈ کے خلاف چوتھے T20I سے قبل نیٹ میں بیٹنگ کرتے ہوئے انہیں دائیں پسلی کے پنجرے میں تکلیف ہوئی تھی جس کی وجہ سے وہ اس میچ سے بھی محروم ہو گئے تھے۔ بابر اعظم نے عماد کی بقیہ ٹورنامنٹ میں شرکت کے حوالے سے پر امید اظہار کیا۔

(جاری ہے)

انہوں نے مزید کہا کہ اگرچہ عماد پہلا میچ نہیں کھیلیں گے ہمیں امید ہے کہ وہ باقی میچوں کے لیے دستیاب ہوں گے۔

توقع ہے کہ عماد 9 جون کو نیویارک میں بھارت کے خلاف میچ کے لیے سلیکشن کے لیے تیار ہوں گے۔ ٹی ٹونٹی ورلڈ کپ کے لیے قومی سکواڈ بابر اعظم (کپتان)، ابرار احمد، اعظم خان، فخر زمان، حارث رؤف، افتخار احمد، عماد وسیم، محمد عباس آفریدی، محمد عامر، محمد رضوان، نسیم شاہ، صائم ایوب، شاداب خان، شاہین شاہ آفریدی اور عثمان خان پر مشتمل ہے۔