گورنر پنجاب سردار سلیم حیدر خان سے گورنر بلوچستان جعفر خان مندوخیل کی ملاقات

لاہور (اُردو پوائنٹ اخبارتازہ ترین - این این آئی۔ 18 مئی2024ء) گورنر پنجاب سردار سلیم حیدر خان سے گورنر ہائوس لاہور مین گورنر بلوچستان جعفر خان مندوخیل نے ملاقات کی۔ گورنر پنجاب نے اپنے ہم منصب کو گورنر ہاؤس لاہور میں خوش آمدید کہا اور گورنر بلوچستان کا منصب سنھالنے پر انہیںمبارکباد دی۔ملاقات میں باہمی دلچسپی کے امور اور ملکی مجموعی صورتحال سمیت مختلف معاملات پر تبادلہ خیال کیا گیا۔

اس موقع پر گفتگو کرتے ہوئے گورنر پنجاب سردار سلیم حیدرخان نے کہا کہ ملک میں استحکام کے لیے اتحادی حکومت کو مضبوط بنانا اور اس کا چلنا بہت ضروری ہے۔اُنہوں نے کہا کہ ملک کے وسیع تر مفاد میں مسلم لیگ(ن)کے ساتھ بہترین ورکنگ ریلیشن شپ ہو گی۔ گورنر پنجاب نے کہا کہ اپوزیشن سمیت تمام پارٹیوں کو ملک کی ترقی اور استحکام کے لیے ایک پیج پر ہونا چاہیئے۔

(جاری ہے)

گورنر پنجانے کہا کہ یہ بڑی خوش آئند بات ہے کہ ملک کے معاشی اشاریے بہتری کی طرف جا رہے ہیں۔اُنہوں نے مزید کہا کہ وفاق اور صوبے کے درمیان رابطے بہتر بنانے میں مثبت کردار ادا کروں گا۔ گورنر بلوچستان جعفر خان مندوخیل نے کہا کہ صوبہ بلوچستان کی بہتری،ترقی اور امن و امان ترجیح ہے۔دریں اثنا، گورنر پنجاب سردار سلیم حیدر خان سے گورنر ہائوس لاہور میں جنرل سیکریٹری پیپلز پارٹی وسطی پنجاب سید حسن مرتضی کی قیادت میں وفد نے ملاقات کی۔

وفد کے ارکان نے گورنر پنجاب سردار سلیم حیدر کو گورنر پنجاب کا عہدہ سنبھالنے پر مبارکباد دی اور نیک خواہشات کا اظہار کیااس موقع پر گفتگو کرتے ہوئے گورنر پنجاب سردار سلیم حیدر خان نے کہا کہ ملک کی بہتری اور خوشحالی کے لیے سب کو مل کر چلنا ہے اور مثبت کردار ادا کرنا ہے۔اُنہوں نے کہا کہ میں صرف پیپلز پارٹی کا نہیں ، پورے پنجاب کا گورنر ہوں۔

اُنہوں نے کہا کہ گورنر ہائوس لاہور کے دروازے پارٹی ورکرز سمیت سب کے لیے ہر وقت کھلے ہیں۔ گورنر پنجاب نے کہا کہ پاکستان پیپلز پارٹی نے ہمیشہ اپنے ورکرز کو عزت دی ہے۔اُنہوں نے کہا کہ پاکستان پیپلز پارٹی نے ہمیشہ مزدوروں اور محروم طبقے کے حقوق کی بات کی ہے۔گورنر پنجاب نے مزید کہا کہ پنجاب کی بہتری کے لیے ہر ممکن کوشش کروں گا۔ ملاقات میں سابق ایم پی اے فاروق یوسف گھرکی، سابق ایم پی اے ثانیہ کامران، ذکی چوہدری، آصف ناگرہ، بیرسٹر عامر حسن، بشارت صدیقی ، عائشہ غوری، سحر ہادی بخای، ایڈون سہوترا ، ڈاکٹر خیام ، حسن اشرف بھٹی اور اصغر بھٹی و دیگر شامل تھے۔