آزاد کشمیر،پولیس اہلکار کے قاتلوں کی گرفتاری کیلئے بار کونسل کی ڈیڈ لائن

اتوار 19 مئی 2024 14:45

میرپور (اُردو پوائنٹ اخبارتازہ ترین - این این آئی۔ 19 مئی2024ء) میرپور آزاد کشمیر بار کونسل نے سب انسپکٹر عدنان کے قاتلوں کی گرفتاری کے لیے ڈیڈ لائن دے دی۔بار کونسل نے سرکلر میں کہا کہ 22 مئی تک قاتل کو گرفتار نہیں کیا گیا تو پورے آزاد کشمیر میں احتجاج ہو گا، پولیس حقائق کو مسخ کر کے وکلا کے خلاف کیس بنا رہی ہے۔

(جاری ہے)

وائس چیئرمین بار کونسل نے مطالبہ کیا ہے کہ ایس ایس پی اور ڈی آئی جی میرپور کو معطل کیا جائے، غفلت کے مرتکب افسران معطل نہ ہوئے تو احتجاج کریں گے۔

دوسری جانب ضلع میرپور پولیس کے ترجمان نے کہا کہ عدنان شہید کے قتل میں نامزد ملزمان گرفتار ہیں، شواہد کی روشنی میں مزید گرفتاریاں کی جا رہی ہیں۔ترجمان کے مطابق عدنان شہید کیس سے متعلق سوشل میڈیا پر غلط پراپیگنڈا کیا جا رہا ہے، تمام شواہد جمع کر لیے ہیں اور ایڈیشنل ایس پی کی سربراہی میں ٹیم تشکیل دے دی ہے۔یاد رہے کہ آزاد جموں و کشمیر میں حالیہ پر تشدد مظاہروں کے دوران سب انسپکٹر عدنان شہید ہو گئے تھے۔