کراچی ، ڈیفنس کے بنگلے میں جواں سال ملازمہ کی پراسرار ہلاکت پر ورثا سراپا احتجاج

کراچی(اُردو پوائنٹ اخبارتازہ ترین - این این آئی۔ 19 مئی2024ء) کراچی کے علاقے ڈیفنس کے بنگلے میں جواں سال ملازمہ کی پراسرار ہلاکت پر ورثا سراپا احتجاج بن گئے، کورنگی روڈ سے گورنر ہائوس اور پھر پریس کلب کے باہر احتجاج کیا گیا، اس موقع پر ٹریفک جام سے شہریوں کو مشکلات کا سامنا کرنا پڑا۔ صوبائی وزیر داخلہ نے بھی واقعہ کا نوٹس لے لیا ہے۔پاریہ کماری کے ورثا نے دعوی کیا ہے کہ پاریہ کماری کو قتل کیا گیا ہے اور پولیس واقعہ کو خودکشی ظاہر کرنے کی کوشش کررہی ہے۔

(جاری ہے)

پاریہ کے والد ہیرا نے کہاکہ واقعہ سے کچھ دیر پہلے ہی بیٹی سے فون پر گھر والوں کی بات ہوئی تھی۔مظاہرے میں شریک خواتین نے کہاکہ پاریہ کے جسم پر تشدد کے نشانات بھی تھے، اسے قتل کیا گیا، ہمیں انصاف چاہیے۔دوسری طرف وزیر داخلہ سندھ ضیا الحسن لنجار نے واقعہ کا نوٹس لیتے ہوئے ڈی آئی جی سائوتھ سے واقعہ کی تفصیلی رپورٹ طلب کرلی ہے۔واضح رہے کہ پاریہ کماری کی ہلاکت کا واقعہ 12 مئی کو پیش آیا تھا، بنگلے کے مالکان کا دعوی تھا کہ پاریہ نے بنگلے میں پنکھے سے لٹک کر خودکشی کی ہے۔پولیس نے پاریہ کے ورثا کے دعوے پر بنگلے کے مالکان کے خلاف قتل کا مقدمہ درج کیاتھا ۔