وزیراعظم کی ترک کمپنیوں کو پاکستان میں اپنی صنعتیں منتقل کرنے کی دعوت

اسلام آباد ( اُردو پوائنٹ اخبارتازہ ترین۔ 20 مئی 2024ء ) وزیراعظم شہباز شریف نے ترک کمپنیوں کو پاکستان میں اپنی صنعتیں منتقل کرنے کی دعوت دے دی۔ تفصیلات کے مطابق وزیرِاعظم محمد شہباز شریف سے آج ترکیہ کے وزیرِ خارجہ حاقان فدان کی اسلام آباد میں ملاقات ہوئی، اس موقع پر پاکستان اور ترکیہ کے مابین خصوصی اہمیت کے حامل برادرانہ تعلقات کی اہمیت کا ذکر کرتے ہوئے وزیرِاعظم نے دونون ممالک کے مابین باہمی تعلقات کے فروغ پر گہرے اطمینان کا اظہار کیا، وزیرِاعظم نے دونوں ممالک کے مختلف شعبوں بالخصوص تجارت، سرمایہ کاری، ٹیکنالوجی اور دفاعی شعبے میں پاکستان کی جانب سے باہمی تعاون کو مزید مضبوط کرنے کے عزم کا اعادہ کیا۔

معلوم ہوا ہے کہ ملاقات میں دونوں رہنماؤں نے دونوں ممالک کی قومی دلچسپی کے امور پر ایک دوسرے کی بھرپور حمایت کے عزم کا اظہار کیا، وزیرِاعظم نے آئندہ تین برس میں دونوں ممالک کے مابین تجارت کے حجم کو 5 ارب ڈالر سالانہ کی سطح پر لانے کیلئے کوششیں تیز کرنے کے عزم کا اظہار کیا، ترک کمپنیوں کو پاکستان میں اپنی سرمایہ کاری کو وسعت دینے کی دعوت دی، شہباز شریف نے کہا کہ دونوں ممالک کے مابین تجارت کاحجم بہترین باہمی تعلقات سے ہم آہنگ نہیں، ہم ترک کمپنیوں کو پاکستان میں اپنی صنعتوں کو منتقل کرنے کیلئے دعوت دے رہے ہیں۔

(جاری ہے)

بتایا گیا ہے کہ ملاقات میں عالمی و علاقائی حالات بالخصوص غزہ میں بگڑتی ہوئی صورتِ حال پر بھی ملاقات میں گفتگو ہوئی، وزیرِاعظم نے ترک صدر رجب طیب اردوان کی مشرق وسطی میں پائیدار امن کے قیام کیلئے غزہ میں مکمل جنگ بندی کی حمایت کی بھی تعریف کی، وزیرِاعظم نے مشرقِ وسطی میں مستقل امن کیلئے دو ریاستی حل کی کلیدی اہمیت پر زور دیا، وزیرِاعظم نے ترک صدر کو پاکستان کا جلد دورہ کرنے کی دعوت دی، رجب طیب اردوان کو ہائی لیول اسٹریٹجک کوآپریشن کونسل کے 7 وین اعلی سطح کے اجلاس کی مشترکہ صدارت کی دعوت کا پیغام بھی دیا۔