Live Updates

وزیرآباد،عمران خان حملہ کیس میں گرفتار ملزمان احسن نذیر اور مدثر نذیر کو انسداد دہشتگردی عدالت نے بری کر دیا

پیر 20 مئی 2024 21:00

وزیرآباد(اُردو پوائنٹ اخبارتازہ ترین - این این آئی۔ 20 مئی2024ء) عمران خان حملہ کیس میں وزیرآباد سے گرفتار ہونے والے ملزمان احسن نذیر اور مدثر نذیر کو انسداد دہشتگردی عدالت نے بری کر دیا، ملزمان بھائیوں پر حملے کی پلاننگ کرنے کا الزام تھا، دونوں ملزمان نواحی علاقہ سوہدرہ کے رہائشی ہیں اور عمران خان حملہ کیس میں انہیں مرکزی ملزم نوید علی کے بعد گرفتار کیا گیا تھا۔

تفصیلات کے مطابق انسداد دہشت گردی عدالت نے پی ٹی آئی لانگ مارچ و عمران خان حملہ کیس کے دو ملزمان کو باعزت بری کر دیا ہے۔احسن اور مدثر نامی بھائیوں پر حملے کی پلاننگ کرنے کا الزام تھا۔ حملے کے بعد احسن نذیر کو وزیرآباد میں واقع ان کی کمپیوٹر ریپئرنگ شاپ سے حراست میں لیا گیا تھا جبکہ میاں مدثر نذیر کو بھی بعد ازاں حساس اداروں نے حراست میں لیا۔

(جاری ہے)

مقدمہ کا پیرکوانسداد دہشتگردی کی عدالت نے فیصلہ جاری کر دیا جس میں لکھا گیا ہے کہ احسن نذیر اور مدثر نذیر کو زیر دفعہ 265ڈی بری کیا جاتا ہے اور احکامات میں لکھا ہے کہ مختار کنگ فش نامی ہوٹل پر اس واقعہ کی پلاننگ کا الزام بے بنیاد ہے کیونکہ مختار کنگ فش کے مالک اور چیف شیف نے اپنے بیان حلفی جمع کرائے ہیں کہ دکان 22نومبر کو پولیس نے سیکورٹی وجوہات کی بنا پر بند کروا دی تھی۔

مقدمہ کے ایک گواہ قمر زمان نے بھی حلفی بیان جمع کروایا ہے کہ اس سے پوچھے بغیر اس کا بیان لکھا گیا تھا اور 2نومبر کو وہ مختار کنگ فش ہوٹل گیا ہی نہیں ۔ لہٰذااس منظر نامے میں مذکورہ ملزمان کے خلاف مقدمے کی کارروائی کی کوئی وجہ نہیں ہے۔ یاد رہے دونوں بھائی احسن نذیر اور مدثر نذیر بالترتیب 5ماہ اور 4ماہ جیل میں قید رہے جن کی بعد ازاں ضمانت منظور ہوئی اورپیرکو انسداد دہشتگردی کی عدالت نے انہیں باعزت بری کر دیا ہے۔