افغان سرزمین سے پاکستان میں دہشت گردی کے واقعات میں اضافہ

راولپنڈی(اردو پوائنٹ اخبارتازہ ترین۔22 مئی 2024 ) سیکیورٹی فورسز نے ایک ماہ میں 29 دہشت گردوں کو ہلاک کیا ہے،افغان سرزمین سے پاکستان میں دہشت گردی کے واقعات میں اضافہ ہوا ہے۔ پاک فوج کے شعبہ تعلقات عامہ (آئی ایس پی آر) کے مطابق دہشت گرد پاک افغان بارڈرسے داخلے کی کوشش کرتے ہیں، پاک افغان بارڈراورملحقہ علاقوں میں آپریشن کئے جارہے ہیں۔آئی ایس پی آر کے مطابق دہشت گردسیکیورٹی فورسزاورمعصوم شہریوں کونشانہ بناتے ہیں۔

آئی ایس پی آر کامزید کہنا ہے کہ بلوچستان سمبازاعلاقے میں 21اپریل سے آپریشنز جاری ہیں۔ آپریشن کے دوران 14مئی کوخفیہ معلومات پر آپریشن کیا گیا، میجربابراسی آپریشن کے دوران شہید ہوئے۔پاک فوج کے شعبہ تعلقاتِ عامہ نے کہا ہے کہ پاکستان کی سیکیورٹی فورسز سرحدوں کو محفوظ بنانے اور دہشت گردی کی لعنت سے شہریوں کی حفاظت یقینی بنانے کیلئے پر عزم ہیں۔

(جاری ہے)

آئی ایس پی آر کا کہنا ہے کہ عبوری افغان حکومت کو موثر بارڈر مینجمنٹ یقینی بنانے کیلئے بار بار کہا ہے، توقع ہے کہ عبوری افغان حکومت اپنی ذمے داریاں پوری کرے گی۔پاک فوج کے شعبہ تعلقاتِ عامہ کا مزید کہنا ہے کہ توقع ہے کہ افغان حکومت پاکستان مخالف دہشت گرد کارروائیوں کیلئے افغان سر زمین استعمال نہیں ہونے دے گی۔یاد رہے کہ چند روز قبل بھی سیکیورٹی فورسز نے صوبہ خیبرپختونخوا کے علاقے ٹانک میں انٹیلی جنس آپریشن کے دوران 4 دہشت گردوں کو ہلاک کردیاتھا۔

ہلاک دہشت گردوں سے اسلحہ، گولہ بارود اور دھماکا خیز مواد برآمد ہواتھا۔ پاک فوج کے شعبہ تعلقات عامہ (آئی ایس پی آر) کی جانب سے بتایا گیا تھاکہ ٹانک میں دہشت گردوں کی موجودگی پر سیکیورٹی فورسز کا آپریشن کیا گیا تھا۔آپریشن کے دوران سیکیورٹی فورسز اور دہشت گردوں کے درمیان فائرنگ کا تبادلہ ہوا تھا۔ فائرنگ کے تبادلے میں 4 دہشت گرد ہلاک ہوگئے تھے۔

آئی ایس پی آر کے مطابق ہلاک دہشت گردعلاقے میں مختلف دہشت گردانہ کارروائیوں میں ملوث تھے۔آئی ایس پی آر کا کہنا تھا کہ مقامی لوگوں نے سکیورٹی فورسز کے آپریشن کو سراہا تھا۔سیکیورٹی فورسز ملک سے دہشت گردی کی لعنت کے خاتمے کیلئے پرعزم ہیں۔آپریشن کے دوران دہشت گردوں کے ٹھکانے کو بھی تباہ کر دیا گیا اور اسلحہ، گولہ بارود اور دھماکا خیز مواد کا بڑا ذخیرہ برآمد کر لیا گیا تھا۔