ناقص پرفارمنس ، حسن علی ٹی ٹونٹی ورلڈ کپ سکواڈ سے باہر

لاہور (اردو پوائنٹ تازہ ترین اخبار ۔ 22 مئی 2024ء ) انگلینڈ کے خلاف آج سے لیڈز میں شروع ہونے والی سیریز سے قبل فاسٹ باؤلر حسن علی کو پاکستان کے ٹی ٹوئنٹی سکواڈ سے فارغ کر دیا گیا ہے اور ان کی ورلڈ کپ سکواڈ میں بھی شرکت کا امکان بھی اب نہ ہونے کے برابر ہے۔ پاکستان ٹیم مینجمنٹ نے حسن علی کو واروکشائر کے لیے کاؤنٹی کرکٹ میں اپنی کمٹمنٹ پوری کرنے دینے کا فیصلہ کیا ہے۔

ابتدائی طور پر حسن علی کو حارث رؤف کے لیے انجری کور کے طور پر منتخب کیا گیا تھا ۔ واضح رہے کہ قومی ٹیم کے ورلڈ کپ سکواڈ کا اعلان انگلیںڈ کے خلاف سیریز کے دوران متوقع ہے۔ قبل ازیں آئرلینڈ کیخلاف سیریز کے دوران فاسٹ بولر حسن علی کو موقع دیا گیا تھا تاہم کمزور آئرش بلےبازوں سے 3 اوورز میں 42 رنز کھائے اور کوئی وکٹ بھی حاصل نہ کرسکے تھے۔

(جاری ہے)

سکواڈ کی تشکیل کو حتمی شکل دینے اور حارث رؤف کی فٹنس کے خدشات کو ممکنہ طور پر دور کرنے کے بعد انتظامیہ نے حسن علی کو اپنی کرکٹ کی کوششوں کو کہیں اور جاری رکھنے کا موقع دینے کا انتخاب کیا۔ یہ بات قابل غور ہے کہ حسن علی، جو اپنی جارحانہ تیز گیند بازی کے لیے جانے جاتے ہیں، کھیل کے مختلف فارمیٹس میں پاکستان کے لیے ایک اہم اثاثہ رہے ہیں۔ تاہم ٹیم مینجمنٹ نے سکواڈ کے استحکام اور مستقل مزاجی کو ترجیح دی ہے جس سے حسن علی کو اپنے کاؤنٹی کرکٹ کے دور پر توجہ مرکوز کرنے کی اجازت دی گئی ہے۔