صوبائی وزیر زراعت کا چکوال کا دورہ، سینٹر آف ایکسیلینس فار اولیو ریسرچ اینڈ ٹریننگ کا افتتاح کیا

لاہور (اُردو پوائنٹ اخبارتازہ ترین - اے پی پی۔ 23 مئی2024ء) صوبائی وزیر زراعت پنجاب سید عاشق حسین کرمانی نے جمعرات کو چکوال کا دورہ کیا جس دوران انہوں نے سینٹر آف ایکسی لینس فار اولیو ریسرچ اینڈ ٹریننگ کا افتتاح کیا۔ اس ادارہ کا مقصد زیتون پر تحقیق اور ٹریننگ دینا ہے،اس ادارہ کے تحت اس خطہ کے حوالے سے مطابقت رکھنے والی زیتون کی اقسام متعارف کروائی جا رہی ہیں۔

ڈاکٹر رمضان انصر پراجیکٹ ڈائریکٹر ادارہ برائے زیتون تحقیق و ٹریننگ چکوال نے بتایا کہ کاشتکاروں کو زیتون کی برداشت اور اس سے تیار ہونے والی مختلف مصنوعات کی تیاری کی تربیت بھی دی جارہی ہے،کاشتکاروں کو سبسڈی پر زیتون کے تیل کی کشیدگی کی سہولت دینے کے لیے پلانٹ لگایاگیا ہے،ہر سال پنجاب بھر سے کاشتکار یہاں سے زیتون کے کشیدگی کروا کے دیتے ہیں۔

(جاری ہے)

اس موقع پر وزیر زراعت پنجاب نے زیتون سے تیار شدہ مصنوعات کے سٹالز کا بھی دورہ کیا۔وزیر زراعت پنجاب نے ادارہ کی لیبارٹریز اور کشید کرنیوالے پلانٹ کا بھی معائنہ کیا۔اس موقع پرسیکرٹری زراعت پنجاب افتخار علی سہو نے کہا کہ ادارہ برائے زیتون تحقیق اور ٹریننگ چکوال کا کام قابل تحسین ہے۔ ڈائریکٹر جنرل زرعی تحقیق ڈاکٹر ساجد الرحمان، سید شاہد افتخار بخاری ڈائریکٹر زراعت توسیع راولپنڈی ڈویژن، ڈاکٹر انجم علی بٹر، پراجیکٹ ڈائریکٹر محکمہ زراعت پنجاب بھی اس موقع پر موجود تھے۔

بعد ازاں وزیر زراعت پنجاب سید عاشق حسین کرمانی نے بارانی زرعی تحقیقاتی ادارہ چکوال کا دورہ کیا۔ دورہ کے دوران وزیر زراعت پنجاب کا کہنا تھا کہ محکمہ زراعت پنجاب کا یہ ادارہ بارانی علاقوں کے لئے فصلوں کی نئی اور جدید زرعی ٹیکنالوجی کو متعارف کروانے کے لئے تحقیقی کام کر رہا ہے۔ اس موقع پر بارانی زرعی تحقیقاتی ادارہ چکوال کے ڈائریکٹر محمد اشرف سمرا نے بریفنگ دیتے ہوئے بتایا کہ بارانی زرعی تحقیقاتی ادارہ چکوال ہائی ویلیو کراپس خصوصا مختلف روایتی پھلوں کو متعارف کروانے کے لئے کام کر رہا ہے، ان پھلوں میں بلیک بیری، ایووکیڈو، نیکٹرین، پستہ وغیرہ شامل ہیں جبکہ ادارہ کی طرف سے ان مختلف پھلوں کے پودے بھی کاشت کئے جا رہے ہیں۔